Тоқаев Қытайға тауарларды интернет жылдамдығымен жеткізуді ұсынды

Мемлекет басшысы Қасым-Жомарт Тоқаев Қытайдың жетекші компанияларының өкілдерімен кездесу барысында екі ел арасындағы логистикалық байланысты жаңа деңгейге көтеру бастамасын көтерді. Президент тауарлардың мемлекеттік шекарадан өту уақытын интернет арқылы деректер алмасу жылдамдығымен теңестіру қажеттігін мәлімдеді.

Кездесуде Президент Қазақстанның логистика саласындағы негізгі жобасы - Smart Cargo платформасына тоқталды. Бұл жүйе кедендік, логистикалық және коммерциялық қызметтерді біріктіретін «бір терезе» қағидаты бойынша жұмыс істейтін бірыңғай цифрлық орта.

«Қазақстан мен Қытай халықаралық сауданың тиімділігін арттыратын жаңа жаһандық стандарттарды бірлесіп орната алады деп санаймын. Технологиялар мен логистика саласындағы қытайлық компанияларды, сондай-ақ инфрақұрылым инвесторларын осы ауқымды бастаманы жүзеге асыруға белсене қатысуға шақырамын», - деді Қасым-Жомарт Тоқаев.

Мемлекет басшысы Қазақстанды Қытайды Орталық Азия, Кавказ, Таяу Шығыс және Еуропамен байланыстыратын басты көлік-логистикалық хабқа айналдыруды стратегиялық мақсат ретінде айқындады. Қазіргі таңда еліміз арқылы 13 халықаралық көлік дәлізі өтеді, ал Қытай мен Еуропа арасындағы теміржол тасымалының 85%-ға жуығы Қазақстан аумағы арқылы жүзеге асырылады.

Президенттің пікірінше, қазіргі заманда кез келген көлік дәлізінің бәсекеге қабілеттілігі тек физикалық инфрақұрылымға емес, деректер алмасу жылдамдығына, цифрлық интеграцияның деңгейі мен логистиканың ашықтығына тікелей байланысты.