Тоқаев Air Astana басшысына рейстердің кешігу мәселесін шешуді тапсырды

Мемлекет басшысы Қасым-Жомарт Тоқаев Air Astana компаниясының бас атқарушы директоры Ибрагим Жанлыелді қабылдады. Кездесу барысында компанияның қаржылық және операциялық қызметінің нәтижелері, сондай-ақ даму жоспары талқыланды.

Президентке Air Astana әуе паркін 2026–2027 жылдары жаңа буындағы Boeing 787 Dreamliner ұшақтарымен толықтыру жоспары таныстырылды. Компания Airbus A320neo және A321neo үлгісіндегі 50 ұшаққа, сондай-ақ Boeing 787-9 үлгісіндегі 15 әуе кемесіне тапсырыс берген. Бұл ұшақтар 2036 жылға дейін кезең-кезеңімен жеткізіледі.

Ибрагим Жанлыел компанияның ұзақ мерзімді даму стратегиясын таныстырды. Құжат Қазақстанның өңірлік авиациялық хаб ретіндегі әлеуетін күшейтуге, халықаралық бағыттарды кеңейтуге, жаңа рейстер ашуға, мультимодальды тасымалды дамытуға және цифрлық технологияларды енгізуге бағытталған.

Кездесу барысында Қасым-Жомарт Тоқаев әуе паркін жаңарту, бағыттар желісін кеңейту және тасымалдау мүмкіндігін арттырудың маңызын атап өтті. Президент АҚШ пен Жапонияға тікелей әуе рейстерін ашуды басым міндеттердің бірі ретінде атады.

Сонымен қатар Мемлекет басшысы жолаушылар жиі көтеретін рейстердің кешігуі мен әуе кемелерінің ауыстырылуы сияқты мәселелерге назар аударып, қазақстандықтар көп қатынайтын елдермен әуе қатынасын одан әрі дамытудың қажеттігін айтты.