«Тілі әткеншекке жабысып қалған»: Павлодарда жеті жастағы бала өзін оқушылар ұрды деп өтірік айтқан

Павлодарда «екі оқушы 7 жастағы баланың тілін кеспек болды» деген ақпарат расталмады. Полиция тексеріс жүргізіп, жеткіншектің жарақатты өзі алғанын анықтады.

Облыстық полиция департаменті көрші тұрғындардан жауап алып, бейнебақылау жазбаларын қарап, ешқандай әлімжеттік фактісін таппаған.

«Тексеріс нәтижесінде бала аулада әткеншекте ойнап жүрген кезде қызық көріп тілін металл бөлікке тигізіп көрген. Қан шыққанын көрген соң қорқып, оқиғаны ойдан шығарған», – делінген полицияның хабарламасында.

Полицейлер балаға мұндай іс-әрекеттің қауіпті екенін түсіндіріп, анасына ұлын мектеп психологына апаруды ұсынған.

Ведомство мәліметінше, емделіп шыққаннан кейін баланың және анасының ісі Кәмелетке толмағандар ісі жөніндегі комиссияда қаралады.

Ал Павлодар облысының балалар омбудсмені Сәуле Шәкенова жеті жастағы баланың жеке ісін комиссияда қарауға қарсы екенін айтып, анасының баланың өтірік айтқанын растағанын жеткізді.

Бұған дейін Павлодарда екі мектеп оқушысы 7 жастағы баланың тілін кеспек болды деген ақпарат тараған еді. Бұл туралы баланың анасы хабарлаған.