Павлодарда мектеп оқушылары жеті жасар баланың тілін кеспек болған

Павлодарда екі мектеп оқушысы 7 жасар баланың тілін кеспек болған. Бұл туралы облыстық полиция департаменті хабарлады.

Оқиға туралы ақпаратты зардап шеккен баланың анасы таратқан. Оның айтуынша, 9 желтоқсан күні Айманов көшесіндегі №50 үйдің маңында белгісіз екі бала жеткіншекке күш көрсеткен.

«Жасы шамамен 10-дағы екі бала ұлымды жерге құлатып, бірі ұстап тұрған, екіншісі басынан және денесінен тепкілеген. Кейін олардың бірі қайшы шығарып, тілін кесе бастаған. Ұлым сытылып қашып, подъезге жүгіріп кіріп үлгерген», – дейді әйел.

Аталған аумақтағы бейнебақылау камералары жұмыс істемегендіктен, оқиға кадрға түспей қалған. Анасы көрген-білген тұрғындар болса, хабар беруін сұрап отыр.

Қылмыстық іс қозғалды

Полиция кәмелетке толмағанға қасақана жеңіл жарақат салу бабымен қылмыстық іс тіркеді.

«Қазіргі таңда оқиғаға қатысы бар балаларды анықтау және ұстау бағытында қажетті шаралар жүргізіліп жатыр. Тергеу барысында олардың ата-аналарының әрекеттеріне де құқықтық баға беріледі. Сондай-ақ бұл іс Кәмелетке толмағандар ісі жөніндегі комиссияда қаралып, балалар есепке қойылады», – деді департамент өкілдері.

Баланың жағдайы

Облыстық денсаулық сақтау басқармасының мәліметінше, зардап шеккен бала Павлодар облыстық балалар ауруханасының травмпунктіне жеткізілген. Дәрігерлер ми шайқалуын, жоғарғы және төменгі еріндегі жарақаттар мен көгерулерді, тіл ұшындағы кесілген жараны және сөйлеу қиындығын анықтаған.

«Пациент травматология бөліміне жатқызылды. Жағдайы тұрақты, орташа ауыр. Қажетті медициналық көмек толық көлемде көрсетілуде», – делінген нақтылауда.

Баламен психолог жұмыс істей бастады

Балалар омбудсмені Сәуле Шәкенова зардап шеккен баланың анасымен байланысып, жағдайды бақылауға алғанын мәлімдеді. Оның айтуынша, аурухана психологы баламен жұмыс істей бастаған.