Таяу Шығысқа тур алған қазақстандықтар тығырыққа тірелді: ақша қайтарыла ма?

Таяу Шығыстағы жағдайдың ушығуына байланысты демалысқа баруды жоспарлаған көптеген қазақстандық белгісіз жағдайда қалды. Көптеген туристер БАӘ, Катар, Сауд Арабиясы және басқа елдерге тур сатып алған. Алайда аймақтағы шиеленіс салдарынан кейбір рейстер тоқтатылып, адамдар сапарды кейінге қалдыру, бағытты өзгерту немесе ақшаны қайтару мәселесіне тап болды.

Туризм саласының мамандарының айтуынша, жағдай күн сайын өзгеріп отыр. Premium tour туристік агенттігінің басшысы Татьяна Фирсованың сөзінше, қазір БАӘ, Катар және ішінара Оман бағытындағы бірқатар рейстер алдағы күндерге тоқтатылған.

«Рейстер ресми түрде тоқтатылған жағдайда турлар автоматты түрде күшін жояды және туристерге ақша толық қайтарылады», – деді ол.

Ал егер турист сапардан өз еркімен бас тартса, жағдай өзгеше болуы мүмкін.

«Егер рейс әлі тоқтатылмаса, турды аннуляциялау келісімшарт талаптарына сәйкес жүргізіледі. Кей жағдайда айыппұл салынуы мүмкін. Сондықтан асықпай, ресми шешімді күткен дұрыс», – деп түсіндірді Фирсова.

Сарапшылардың айтуынша, туристердің сұранысы қазір екі топқа бөлінеді. Біріншісі – жақын күндері ұшуы тиіс туристер. Олардың рейстері тоқтатылған жағдайда ақша қайтарылады. Екінші топ – сапары кейінгі күндерге жоспарланғандар. Бұл жағдайда туристік компаниялар әзірге нақты шешім күтіп отыр.

Юрист Мария Шукалованың айтуынша, Қазақстан заңнамасына сәйкес турист сапар басталғанға дейін турдан бас тартуға құқылы. Алайда туроператор мен турагенттің нақты шығындары өтелуі тиіс.

«Нақты шығындарға қайтарылмайтын әуе билеттері, қонақүй броньдары, трансфер және басқа қызметтер жатады. Туристік компания бұл шығындарды құжатпен дәлелдеуі керек», – дейді заңгер.

Сондай-ақ белгілі бір жағдайларда сапар форс-мажор ретінде танылуы мүмкін. Мысалы, әуе қатынасының тоқтауы, әуе кеңістігінің жабылуы немесе төтенше жағдайлар.

Мамандар туристерге сабыр сақтап, ресми мәліметтерді күтуге кеңес береді.

«Ең бастысы – дүрлікпеу. Егер рейс тоқтатылса, туристік агенттік өзі хабарласып, барлық мәселені түсіндіреді», – дейді Татьяна Фирсова.

Егер туристер бағытты өзгерткісі келсе, мамандар Оңтүстік-Шығыс Азия елдерін қарастыруға кеңес береді. Атап айтқанда Вьетнам, Таиланд, Үндістан және Қытай бағыттары көктемгі демалыс үшін қолайлы болуы мүмкін.

Сарапшылардың айтуынша, көп жағдайда турлар бойынша нақты шешім авиакомпаниялардың ресми шешімінен кейін ғана белгілі болады.