ШҚО әкімі Зайсандағы халықаралық әуежай құрылысының сапасына қатысты қатаң талап қойды

ШҚО Зайсан ауданында халықаралық әуежай құрылысы бекітілген кестеге сай жалғасуда. Қазіргі уақытта стратегиялық нысанның 75 пайыздан астамы аяқталған. Құрылыс алаңында 310 жұмысшы екі ауысыммен еңбек етіп жатыр, сондай-ақ 75 арнайы техника жұмылдырылған.

Өңір үшін маңызы жоғары жобаның құрылыс барысымен ШҚО әкімі Нұрымбет Сақтағанов танысты. Аймақ басшысы мердігер ұйымдарға жұмыстың сапасы мен мерзіміне қатысты талаптың қатаң екенін кезекті рет ескертті. Бұл инфрақұрылымдық нысан тек облыс үшін емес, республика деңгейінде де айрықша маңызға ие.

«Сапа және тағы да сапа. Бұл кезекті құрылыс нысаны емес. Облысты айтпағанда, еліміз үшін де айрықша маңызға ие әуежай. Сондықтан жұмыс жоспарланған мерзімнен кешікпеуі тиіс. Қандай қосымша сұрақтар болса айтыңыздар. Өйткені, нысан үшін бірінші кезекте жауапкершілік сіздерден сұралатын болады. Әуежай құрылысы кестеге сай аяқталуы үшін барлық мүмкіндіктер жасалуда», – деп атап өтті ШҚО әкімі.

Бас мердігер «ЭЛХОН» ЖШС мәліметінше, қазіргі таңда әуежайдың негізгі инфрақұрылымдық бөліктері толық аяқталған. Компания директоры Жанболат Қазанов атқарылған жұмыстардың қорытындысын ұсынды:

Ұшып-қону жолағының құрылысы толық аяқталды. Перрон мен рулеж жолдары 100 пайыз дайын. Барлық инженерлік-коммуникациялық желілер жүргізілді.

Қазіргі уақытта жұмыстардың төртінші кезеңі атқарылуда. Бұл кезеңде жолаушылар терминалының, авариялық-құтқару қызметінің және өзге relocation нысандарының құрылысы қамтылған. Жоба аясында әуежай аумағында жалпы 11 ғимарат салу көзделген. Барлық нысандарда жұмыс қарқыны жоғары, сонымен қатар іргелес аумақты абаттандыру шаралары қатар жүргізілуде.

ШҚО әкімі құрылыс сапасына қойылатын талаптың әр кезеңде қатаң бақылауда болатынын мәлімдеді. Әуежайдың уақтылы әрі бекітілген стандарттарға сай пайдалануға берілуі – өңірдің көлік-логистикалық әлеуетін арттырудағы негізгі міндеттердің бірі.

Мердігер компания басшылығы құрылыс жұмыстарына кедергі келтіретін мәселелердің жоқтығын, құрылыс материалдары мен қажетті заманауи жабдықтардың толық көлемде дайын екенін жеткізді.

«Жұмыстар жоспарға сәйкес жүргізілуде. Құрылыс материалдары жеткілікті. Әуежайға орнатылатын жабдықтар толық сатып алынып, дайын тұр. Алдын ала жоспар бойынша, биыл 12 шілдеден бастап сынақ ретінде алғашқы ұшуларды бастауды көздеп отырмыз», – деді Жанболат Қазанов.