SCAT әуе компаниясы жеміс-жидек тасымалдау ережесіне қатысты ресми түсініктеме берді

Әлеуметтік желілерде тараған «жеміс себеттерін қол жүгінде тасымалдауға тыйым салынды» деген ақпаратқа байланысты отандық SCAT әуе компаниясы ресми мәлімдеме жасады.

Тасымалдаушы бұл талаптардың жаңа емес, бұрыннан қолданыста екенін атап өтті. Соңғы уақытта туристік агенттіктер жолаушыларға жеміс себеттері тек багаж бөлімінде тасымалданатынын және ол үшін жеке төлем жасалатынын ескерте бастаған. Бұл ақпарат жолаушылар арасында қызу талқыға түсті.

SCAT әуе компаниясының баспасөз қызметі бұл ереженің ұшу қауіпсіздігі мен жолаушылар жайлылығы үшін маңызды екенін түсіндірді:

«Әр жолаушының белгіленген норма бойынша бір багаж және бір қол жүгін алуға құқығы бар. Егер әрбір жолаушы қол жүгінен бөлек жеміс себетін ұшақ салонына кіргізетін болса, багаж сөрелерінде орын қалмайды. Сонымен қатар экипаж үшін әуе кемесінің салмағы мен тепе-теңдігін сақтау бойынша нақты есептеулер жүргізіледі», - деп мәлімдеді компания өкілдері.

SCAT Airlines (SUNDAY Airlines) рейстерінде бір жолаушы үшін келесі нормалар бекітілген:

• Тегін багаж: 23 кг (1 орын);
• Қол жүгі: 10 кг (тегін).

Жеміс салынған себеттер қол жүгіне жатпайды және тегін тасымалдау нормасына кірмейді. Олар тек багаж бөлімінде тасымалданады, ал рәсімдеу мен төлем жасау тіркеу сөресінде жүзеге асырылады.

Мамандардың айтуынша, бұл ережелерді сақтау рейстердің кешігуін алдын алуға және ұшақ ішіндегі тәртіпті қамтамасыз етуге көмектеседі.