Өзбекстанда колониядан қашып кеткен ер адам үшінші сынып оқушысын зорлады деген күдікке ілінді

Ташкент облысының Ахангаран ауданындағы қоныс колониясынан қашқан 31 жастағы ер адам үшінші сынып оқушысын зорлады деген күдікке ілінді. Бұл туралы өзбекстандық Qalampir басылымы хабарлады.

Ферғана облысының тумасы М.Т. 2018 жылы сот үкімімен Қылмыстық кодекстің 118-бабы («Зорлау») бойынша кінәлі деп танылып, 16 жылға бас бостандығынан айырылған. Ол жазасын жалпы тәртіптегі колонияда өтеуі тиіс еді, алайда 2024 жылы Нишан аудандық сотының шешімімен қоныс колониясына ауыстырылған.

Өзбекстан ІІБ Ташкент облыстық бас басқармасының ресми өкілі Бобур Тулягановтың мәліметінше, сотталған адам 16 қазанда қашып шығып, сол күні Ахангаран ауданында кәмелетке толмаған қызға азғындық әрекет жасаған.

Қазір оған қатысты Қылмыстық кодекстің 119-бабы, 4-бөлігі («Жыныстық қажеттілікті күш қолдану арқылы қанағаттандыру, табиғи емес формада») бойынша іс қозғалды.

"Сол күні күдіктіні тәртіп сақшылары ұстап, қамауға алды. Тергеу амалдары жүріп жатыр, – деді Бобур Туляганов.

Осыған ұқсас жағдай жақында Наманган облысында болған. 14 қазанда 7 жастағы қыз баланы өз туысы, 38 жастағы ер адам зорлаған.

Бұл оқиғалар Өзбекстан қоғамында үлкен резонанс тудырды. Өзбек парламентінің төменгі палатасының депутаты Дилноза Азизова балаларға жасалған кез келген жыныстық зорлық үшін өмір бойына бас бостандығынан айыру жазасын енгізуді ұсынды.

"Менің талабым айқын: балаларға қатысты жыныстық зорлықтың кез келген түрі үшін өмір бойына бас бостандығынан айыру жазасын енгізу керек", – деді депутат.

Сондай-ақ қазан айының басында Қырғызстан президенті Садыр Жапаров та осындай қылмыстарға қатысты мәлімдеме жасап, балалар мен әйелдерге қарсы қылмыстар үшін өлім жазасын қайта енгізу бастамасын көтерген. Бұл ұсыныс Ыстықкөл облысында 17 жастағы Айсулуу Мукашеваның зорланып, өлтірілуінен кейін айтылған болатын.