Отандық әуе компаниялары жазғы маусымда Батуми мен Ұлан-Батырға тікелей рейстер ашады

Отандық тасымалдаушылар FlyArystan және SCAT қазақстандықтар үшін жазғы демалыс бағыттарының географиясын кеңейтеді. Маусым айының басынан бастап Грузия мен Моңғолияға тікелей әуе қатынасы іске қосылады.

Қазақстандық «FlyArystan» лоукостері 6 маусымнан бастап Ақтау – Батуми – Ақтау бағыты бойынша халықаралық рейстерді бастайды. Әуе қатынасы аптасына екі рет — сейсенбі және сенбі күндері жүзеге асырылады. Ұшу кестесіне сәйкес, Ақтаудан ұшақ жергілікті уақытпен сағат 09:05-те аттанса, кері бағыттағы рейс сағат 10:55-те жоспарланған. Билет құны бір бағытқа 41 340 теңгеден басталады. Аталған рейстер 19 тамызға дейін жалғасады.

Еліміздің тағы бір ірі әуе тасымалдаушысы «SCAT» компаниясы 2 маусымнан бастап Астана мен Ұлан-Батыр арасында тұрақты рейстерді орындай бастайды. Ұшақтар елордадан сейсенбі және жұма күндері, ал Моңғолия астанасынан сәрсенбі және сенбі күндері қатынайды. Астанадан Ұлан-Батырға бағытталған билеттердің бастапқы бағасы 96 562 теңгені құрайды.

Бұл жаңа бағыттардың ашылуы Қазақстан мен аталған елдер арасындағы туристік және іскерлік байланыстарды нығайтуға, сондай-ақ отандық авиация нарығының әлеуетін арттыруға септігін тигізбек.