Министрлік Шайдоровтың сыйақысы бойынша мәлімдеме жасады: Чемпион қаржыны қашан алады

Туризм және спорт министрлігі Олимпиада чемпионы Михаил Шайдоровқа тиесілі сыйақылар мен баспананы беру мерзіміне қатысты түсініктеме берді. Ведомствоның хабарлауынша, спортшыға және оның жаттықтырушылар құрамына арналған ақшалай сыйақы маусым айында белгіленген тәртіппен төленеді, деп хабарлайды Informburo.kz.

Заңнамаға сәйкес, алтын медаль үшін берілетін сыйақы көлемі 250 мың АҚШ долларын құрайды. Министрлік бұл қаражаттың маусым айында толықтай аударылатынын растады.

Баспананы ұсыну процесі 2020 жылғы 20 сәуірдегі министр бұйрығымен бекітілген қағидаларға сәйкес жүзеге асырылады. Аталған құжат бойынша, чемпионға үш бөлмелі пәтер қарастырылған. Тұрғын үйді иеленудің заңдық рәсімдері мынадай кезеңдерден тұрады:

1. Әкімдік тұрғын үй комиссиясына тиісті құжатты ұсынады.

2. Комиссия құжатты 30 күн ішінде қарастырады.

3. Оң шешім қабылданған жағдайда, 10 күн ішінде пәтер беру туралы қаулы шығарылады.

4. Келесі 30 күн ішінде келісімшарт жасалады.

Заңға сәйкес, пәтер алғашқы 10 жылға қызметтік баспана ретінде беріледі. Осы мерзім өткеннен кейін ғана спортшы жылжымайтын мүлікті жеке меншігіне толық өткізіп ала алады.

Бұған дейін БАҚ беттерінде спортшының жалақы алмағаны туралы ақпарат тараған болатын. Министрлік бұл мәселеге қатысты тараптардың жаңа келісімшартқа қол қойғанын және қаржыландыру шарттарының жақсартылғанын хабарлады. Қазіргі таңда спортшы алдағы халықаралық жарыстарға дайындық жұмыстарын жалғастыруда.