Министрлік 2026 жылғы Олимпиадаға қанша қаржы жұмсайтыны белгілі болды

ҚР Туризм және спорт министрлігінің Дене шынықтыру және спорт істері комитеті төрағасының орынбасары Нұрлан Есембаев 2026 жылы өтетін қысқы Олимпиада ойындарына дайындыққа бөлінетін қаржы көлемін атады.

Оның айтуынша, 2025 жылы қысқы Олимпиадаға сапалы дайындықты қамтамасыз ету үшін жалпы қаржыландыру көлемі 13,2 млрд теңгені құрайды. Оның ішінде федерациялар қаражаты – 585 млн теңге, республикалық бюджеттен – 5,3 млрд теңге, жергілікті бюджеттен – 6,2 млрд теңге бөлінген. Бұдан бөлек, Туризм және спорт индустриясын қолдау қорынан 812,5 млн теңге қарастырылған.

Нұрлан Есембаевтың дерегінше, 2026 жылғы қысқы Олимпиадаға Қазақстан атынан шамамен 35 спортшы қатысады деп жоспарланып отыр. Спортшылардың ең көбі Ақмола облысынан, Астана қаласынан, Шығыс Қазақстан облысынан және Алматы қаласынан іріктелген. Атап айтқанда, Ақмола облысынан – 9, Астана қаласы мен Шығыс Қазақстан облысынан – 8 спортшыдан, Алматы қаласынан – 6, Қостанай облысынан – 5, Шымкент қаласынан – 4, Павлодар облысынан – 3 спортшы қатысады. Ал Солтүстік Қазақстан, Қарағанды және Абай облыстарынан бір-бір спортшыдан бар.

XXV қысқы Олимпиада ойындары 2026 жылғы 6–22 ақпан аралығында Милан және Кортина-д’Ампеццо қалаларында өтеді. Олимпиадаға 93 елден 2 900-ден астам спортшы қатысады деп күтіліп отыр. Барлығы 116 медаль жиынтығы сарапқа салынады.

Қазақстан құрамасы Олимпиадаға 10 дисциплина бойынша қатысуды жоспарлап отыр. Қазіргі уақытта мәнерлеп сырғанау, шорт-трек және конькимен жүгіру спорт түрлерінен 23 лицензия бар екені белгілі.