Министр Қызылорда облысына арнайы барып, әскери бөлімдердің жағдайымен танысты

Қорғаныс министрі, авиация генерал-лейтенанты Дәурен Қосанов жұмыс сапарымен Қызылорда облысына барып, өңірдегі әскери басқару органдарының қызметі мен әскери бөлімдердің жай-күйін тексерді.

Сапар барысында министр облыстық аумақтық қорғаныс бригадасында болып, бөлім командирінің қазіргі жағдай жөніндегі баяндамасын тыңдады. Сондай-ақ 99215 әскери бөлімінің штаб жұмысына, жеке құрамның орналасу және тамақтану жағдайларына тексеріс жүргізілді.

Қорғаныс істері жөніндегі департамент пен қалалық басқармада Дәурен Қосановқа жергілікті атқарушы органдармен бірлесіп өткізілген күзгі әскерге шақыру науқанының қорытындылары, сондай-ақ запастағы әскери қызметшілерді даярлау барысы туралы ақпарат берілді. Министр әскери мекемелердегі жөндеу жұмыстары аяқталған жаңартылған ғимараттардың жағдайына да назар аударды.

66597 әскери бөлімінде Қорғаныс министрі штаб жұмысына баға беріп, казарма мен асхананы аралады, сарбаздармен әңгімелесті және әскери қызметшілердің әлеуметтік-тұрмыстық жағдайларымен танысты. Сонымен қатар дербес барлау полкінің зымыран-артиллериялық қару-жарақ қоймасы мен жауынгерлік машиналар паркінің жай-күйі тексерілді.

Сапар қорытындысы бойынша Қорғаныс министрі бөлімшелердің жауынгерлік әзірлігі мен ұрысқа қабілеттілігін арттыруға, қызмет ету жағдайларын жақсартуға және жеке құрамның жоғары моральдық рухын қамтамасыз етуге бағытталған бірқатар нақты тапсырма берді.