Михаил Шайдоров Спорт министрлігімен келісімшартқа қол қойды

Олимпиада чемпионы Михаил Шайдоров Туризм және спорт министрлігімен жаңа келісімшартқа қол қойды. Бұл туралы вице-министр Серік Жарасбаев мәлімдеді.

«Михаил Шайдоров – қазақстандық спорттың аңызы, өз атын ел спортының тарихына алтын әріптермен жазған тұлға. Келісімшарт құқықтық шеңберде жасалды, тараптар барлық тармақтарды талқылап, өзара келісімге келді», - деді вице-министр.

Министрліктің мәліметінше, келісімшарт бойынша барлық төлемдер толық көлемде жүзеге асырылады. Шайдоров 5 маусымда командасымен бірге келесі маусымға дайындалу үшін АҚШ-қа ұшатын болды. Жақын арада ол министрлікке арнайы келіп, келесі олимпиадалық циклға дайындық, алдағы жарыстар және елдегі мәнерлеп сырғанауды дамыту мәселелерін бірлесіп талқылайды.

Еске салсақ, бұған дейін мәнерлеп сырғанаушы келісімшартта 2030 жылғы Олимпиадада міндетті түрде медаль жеңіп алу шарты болғанын айтып, құжатқа қол қоюдан бас тартқан еді. Ол өзі мен командасының бес ай бойы жалақы алмағанын, сондай-ақ 2025 жылы норматив орындағанына қарамастан, әлі күнге дейін Қазақстан Республикасының еңбек сіңірген спорт шебері куәлігін алмағанын жеткізген болатын. Спорт дамыту дирекциясы кешігу бар екенін мойындай отырып, наурыз бен сәуір айлары үшін төлемдер объективті себептермен кешіктірілгенін түсіндірді.