Мас күйде көлік жүргізгендерге кешірім жасау керек пе? Депутаттар пікірі екіге бөлінді

Қазақстан Мәжілісі депутаттары мас күйінде көлік жүргізгені үшін жазаланған жүргізушілерге рақымшылық жасау мәселесіне қатысты әртүрлі пікір білдірді, деп хабарлайды informburo.kz

Еске салайық, Қасым-Жомарт Тоқаев 17 наурызда ел тарихындағы алғашқы әкімшілік рақымшылық болатынын мәлімдеген болатын. Ал 18 наурызда премьер-министр тиісті ұсыныстарды екі апта ішінде әзірлеуді тапсырды.

Әлеуметтік желілерде кейбір азаматтар мас күйінде көлік жүргізгендерге жеңілдік жасауды ұсынған. Депутат Ирина Смирнова мұндай мәселе бұған дейін де көтерілгенін атап өтті. Оның айтуынша, кей жағдайларда жүргізушілерде алкоголь деңгейі аз болғанымен, қазіргі заң бойынша кез келген көрсеткіш құқық бұзушылық болып саналады. Болашақта бұл шекті 0,3 промиллеге дейін белгілеу жоспарланып отыр.

Смирнованың пікірінше, жүргізуші куәлігінен 7 жылға айыру – тым қатаң жаза. Әсіресе көлік табыс көзі болып табылатын азаматтар үшін бұл үлкен қиындық тудырады. Егер адам түзелсе, жазаны жеңілдету мүмкіндігін қарастыру керек дейді ол.

Ал депутат Бақытжан Базарбек бұл бастамаға қарсы шықты. Оның сөзінше, мас күйінде рульге отырған адам қоғамға үлкен қауіп төндіреді, сондықтан мұндай құқық бұзушыларға жеңілдік жасау орынсыз.

Қолданыстағы заңнамаға сәйкес, мас күйінде көлік жүргізгендер 15 тәулікке қамауға алынып, 7 жылға жүргізуші куәлігінен айырылады. Ал қайталанған жағдайда өмір бойына көлік жүргізу құқығынан айырылып, бас бостандығынан айыру жазасы қарастырылған.