Қызылорда облысына жаңа әкім тағайындалды

Мемлекет басшысының жарлығымен Мұрат Нәлқожаұлы Ергешбаев Қызылорда облысының әкімі болып тағайындалды. Жарлық 2026 жылғы 8 мамырда Ақорданың ресми сайтында жарияланды.

Осы күні Қызылорда облысының облыстық, қалалық және аудандық мәслихат депутаттарының жиналысы өтті. Жиын барысында облыстың жаңа әкімі болып Мұрат Ергешбаев тағайындалғаны хабарланды. Ол бұған дейін VIII шақырылымдағы Мәжіліс депутаты болған.

Мұрат Ергешбаев 1966 жылғы 12 сәуірде Қызылорда қаласында туған. 1989 жылы Алматы халық шаруашылығы институтын экономист мамандығы бойынша, 1999 жылы Қазақстан Президенті жанындағы Ұлттық жоғары мемлекеттік басқару мектебін мемлекеттік қызмет менеджері мамандығы бойынша бітірген.

Еңбек жолын 1989 жылы Сырдария ауданындағы кеңшарда экономист болып бастаған. Кейін банк саласында, облыс әкімдігі құрылымдарында және мемлекеттік басқару жүйесінде қызмет атқарды.

2008–2010 жылдары Қызылорда қаласының әкімі болды. Одан кейін Қармақшы, Шиелі, Қазалы және Сырдария аудандарын басқарды. 2023 жылғы наурыздан бастап AMANAT партиясының тізімі бойынша VIII шақырылымдағы Мәжіліс депутаты болды.

Бұған дейін Қызылорда облысын басқарған Нұрлыбек Нәлібаев 2026 жылғы 6 мамырда Қазақстан Премьер-министрінің бірінші орынбасары болып тағайындалған еді.