Қозғалтқыш істен шыққан: Air Astana ұшағы Ақтөбеге шұғыл қонды

Air Astana әуе компаниясының Астана – Франкфурт бағыты бойынша ұшқан рейсі Ақтөбе әуежайына мәжбүрлі түрде қонды. Оқиға 2026 жылғы 8 мамырда болғанын компанияның баспасөз қызметі хабарлады.

Әуе тасымалдаушының мәліметінше, ұшақ техникалық себепке байланысты қондырылған. Экипаж қауіпсіздік талаптарына сәйкес шешім қабылдаған. Қону штаттық режимде өткен, жолаушыларды әрі қарай жеткізу үшін Алматыдан қосалқы ұшақ жіберілген. Ұшақтың Ақтөбеден ұшуы жергілікті уақыт бойынша 14:20-ға жоспарланған.

Қазақстанның Көлік министрлігі дерегінше, ұшақ Астанадан ұшқаннан кейін экипаж қозғалтқыштардың бірінің істен шығуына байланысты PAN-PAN дабылын жариялаған. Осыған байланысты экипаж Ақтөбеге қону туралы шешім қабылдаған. Бортта 93 жолаушы және 9 экипаж мүшесі болған.

Ұшақ Ақтөбе әуежайына сағат 11:34-те сәтті қонған. Қонғаннан кейін әуе кемесі тұрақ орнына өздігінен жеткізілген. Қауіпсіздікті қамтамасыз ету үшін әуежайдың авариялық-құтқару қызметтері жұмылдырылған.

Министрлік бұл оқиғаны күрделі авиациялық инцидент ретінде бағалап отыр. Оқиғаның себептерін анықтау үшін ведомствоның көлік оқиғаларын тексеру департаменті тергеу бастайды. Мамандар оқиға орнына барып, бастапқы деректерді жинайды.