«Қолданыстағы Ата Заңды 12 адам ғана жазып шыққан» - дептутат

Мәжіліс депутаты Мақсат Толықбай Конституцияға енгізілетін жаңа өзгерістердің мәні мен оны әзірлеу процесінің ерекшеліктеріне тоқталды. Депутаттың айтуынша, бұл жолғы реформаның басты жетістігі - құжаттың ашықтығы мен халыққа түсінікті тілде жазылуы.

Мақсат Толықбай қолданыстағы заң мен жаңа жобаның авторлар құрамын салыстыра отырып: 

«Қазір бәріміз қолданып жүрген Ата заңның авторларын білетін шығарсыздар, 12-ақ адам жазып шыққан. Оның 9-ы қазақстандық және 3-еуі шетелден шақырылған сарапшылар болған. Ал қазіргі жаңа нормада 130-дай адам жұмыс істеді», - деп мәлімдеді. 

Бұл көрсеткіш заң шығару процесіне тартылған мамандардың ауқымы айтарлықтай кеңейгенін айғақтайды.
Сонымен қатар депутат заң тілінің күрделілігіне қатысты өзекті мәселені көтерді. Ол бұған дейін қазақ тіліндегі мәтіндердің ауыр болғанын жасырмады: 

«Ең бірінші кезекте тілімізді жөндеп алдық. Қазақ тіліндегі мәтінді білетінсіздер, шұбылаңқы, күрделі. Қарапайым адамды қойып, заңгерлердің өзі әрең түсінетін». 

Депутаттың айтуынша, жаңа редакцияда заң нормалары мейлінше қарапайым әрі ұғынықты деңгейге келтірілген.

Мақсат Толықбай жаңа Ата Заңның кіріспе бөліміне (преамбулаға) ерекше мән берілгенін атап өтті. «Біз кімбіз? Қандай халықпыз? Қайда бара жатырмыз? Бізде де тарих бар шығар, біз кімнің мұрагеріміз? Осыны біз тайға таңба басқандай кіріспесіне - преамбулаға жазып көрсеттік», - деп түйіндеді ол.

Бұл өзгерістер Конституцияның тек құқықтық құжат қана емес, елдің тарихи сабақтастығы мен ұлттық бірегейлігін айқындайтын басты манифестке айналатынын көрсетеді.