Көкшетауда әйелді қағып өлтірген жүргізушіге үкім шықты

Көкшетау қалалық соты мамыр айында тұрғын үй ауласында әйелді қағып кетіп, оның өліміне себеп болған әйелге қатысты үкім шығарды. Сот оны Қылмыстық кодекстің 345-бабының 3-бөлігі бойынша кінәлі деп танып, 2 жыл 6 айға бас бостандығынан айыру жазасын тағайындады.

Сотта айыпталушы кінәсін толық мойындаған. Оның айтуынша, жұбайының денсаулығы сыр бергендіктен және оның рұқсатымен көлік тізгініне отырған. Алайда оның жүргізуші куәлігі болмаған. Көлікті жүргізу құқығы жоқ адамға басқаруға рұқсат беру фактісі бойынша бөлек қылмыстық іс қозғалған.

Жаза тағайындау кезінде сот айыпталушының жасаған ісіне өкінетінін, бұрын қылмыстық немесе әкімшілік жауапкершілікке тартылмағанын, екі кәмелетке толмаған баласы барын және моральдық шығынды өз еркімен өтегенін ескерді. Жәбірленуші тарап та материалдық және моральдық талаптарының жоқ екенін айтып, сотталушыны бас бостандығынан айырмауды сұраған. Алайда сот аталған бап бойынша балама жаза қарастырылмағанын атап өтті.

Сонымен қатар сотталған әйелдің екі кішкентай баласы бар болғандықтан, жазаны өтеу мерзімі үш жылға кейінге шегерілді. Үкім әзірге заңды күшіне енген жоқ.

Еске салсақ, қайғылы оқиға 9 мамырда Көкшетаудағы тұрғын үйлердің бірінің ауласында болған. Аулаға бұрылған жол талғамайтын көлік өтіп бара жатқан әйелді қағып, ол оқиға орнында көз жұмған. Көлікті басқарған әйел жүргізуші куәлігін алмаған және автомектепте оқымаған. Оның жұбайы көлікті басқаруға рұқсат бергені үшін жауапқа тартылады. Бұл бап бойынша оған бес жылға дейін бас бостандығынан айыру жазасы қаупі төніп тұр.