ҚМДБ Жетісайдағы тойдағы даулы оқиғаға қатысты мәлімдеме жасады

Қазақстан мұсылмандары діни басқармасы (ҚМДБ) Жетісай ауданындағы тойда әншілерді «шайтанның азаншысы» деп атаған қонақтың сөзіне қатысты мәлімдеме жасады. Басқарма дін адамдарды өзгелерді ауыр сөзбен айыптамауға және әркімнің ар-намысына құрметпен қарауға үндейтінін мәлімдеді.

ҚМДБ-ның хабарлауынша, қандай да бір діни мәселеге байланысты өнер өкілдерін жалпылама айыптау немесе оларды кемсітетін сипаттама беру дұрыс емес. Сондай-ақ әйелдерді бейәдеп сөздермен қорлау да өрескел қателік екені атап өтілді.

Діни басқарманың түсіндіруінше, Ислам діні адамды арсыздыққа, азғындыққа және шариғат тыйым салған әрекеттерге үндейтін әндерді құптамайды. Ал дін мен дәстүрдің құндылықтарын насихаттайтын, Отанды қорғауға, ата-ананы құрметтеуге, адамгершілік пен ізгілікке шақыратын әндерге рұқсат берілген. Бұл мәселеге қатысты ислам ғалымдарының ортақ пікірі бар екені айтылды.

ҚМДБ азаматтарды діни мәселелерде тек ресми діни қызмет атқаратын білікті мамандардың түсіндірмесіне сүйенуге, сөз жауапкершілігін сақтауға және қоғамның бірлігін нығайтуға шақырды.

Еске салайық, бұған дейін әнші Роза Әлқожа Жетісайдағы тойда тілек айтуға шыққан қонақтың әншілерді «шайтанның азаншысы» деп атағанын айтып, бұл әрекетті сынға алған болатын. Кейін Президент әкімшілігі төрағасының бірінші орынбасары Ерлан Қарин де қоғамда мәдениет пен дінді бір-біріне қарсы қоюға және әсіредіншілдікке жол бермеу қажет екенін мәлімдеді.