Кімдер ақылы жолмен тегін жүре алады

Қазақстан Республикасының Заңына сәйкес, еліміздегі ақылы автожолдар мен жол учаскелерінде жүру үшін төлемнен босатылатын көлік құралдарының санаттары анықталды, деп хабарлайды ҚазАвтоЖол.

Заңнамаға сәйкес, тегін жүру құқығы келесі көлік түрлеріне беріледі:

1. Арнайы қызметтік көліктер:

•  Жедел медициналық жәрдем, авариялық-құтқару қызметтері;
•  Құқық қорғау органдары, көліктік бақылау және арнайы мемлекеттік органдар;
•  Қазақстан Республикасының Қарулы Күштері мен басқа да әскери құрылымдар;
•  Ақылы жолдарды күтіп ұстаумен айналысатын ұлттық оператор мен жеке серіктестердің техникасы;
•  Жануарлар дүниесін қорғау және пайдалану саласындағы уәкілетті органның көліктері.

2. Жекелеген көлік санаттары:

•  Ақылы жолға жақын орналасқан елді мекендерді аудан, облыс орталықтарымен, Астанамен немесе республикалық маңызы бар қалалармен байланыстыратын тұрақты жолаушылар тасымалдайтын автобустар;
•  Ақылы жолға іргелес аудандарда тіркелген және сол аудан шегінде қозғалатын автобустар мен жеңіл көліктер;
•  Су тосқауылдары мен теміржол өткелдеріндегі таяу көлік жолайрықтары арасында қозғалатын жүк көліктері мен ауыл шаруашылығы техникалары.

3. Ардагерлер:

•  Ұлы Отан соғысы ардагерлерінің жеңіл автокөліктері.

Жеңілдікті қалай рәсімдеу керек?

Жеңілдік алған көліктердің мемлекеттік тіркеу нөмірлік белгілері арнайы базаға енгізіледі. Соның нәтижесінде, ақылы учаскелерден өткен кезде төлем автоматты түрде есептелмейді.

Жеңілдікке іліну үшін «ҚазАвтоЖол» ҰК» АҚ-на мынадай құжаттарды жолдау қажет:

1. Ресми өтініш (хат);

2. Көлік құралдарының мемлекеттік тіркеу нөмірлерінің тізімі;

3. Тұрақты автобус бағыттары үшін — қолданыстағы маршруттық құжаттардың көшірмелері.

Маңызды ескерту: Жеңілдік тек көлік нөмірі ақпараттық жүйеге енгізілгеннен кейін ғана күшіне енеді. Нөмір тіркелгенге дейінгі жүріс жалпы тәртіппен төленуі тиіс.