Қазаннан бастап Қазақстанда не өзгереді

Қазан айында Қазақстанда жұмыссыз мәртебесін беру, қызметкерлерді міндетті медициналық тексеру, әлеуметтік көмекке қатысты бірқатар өзгеріс күшіне енеді.

Жұмыссыз мәртебесін алу тәртібі өзгереді

1 қазаннан жұмыспен қамту қызметінің жаңа жұмыс тәртібі сынақтан өткізіле бастайды. Жұмыссыз мәртебесін бергенге дейін азаматқа лайықты жұмыс іздеуге берілетін уақыт 2 күннен 13 күнге дейін ұзартылады. Осы аралықта мамандар адамның тәжірибесі мен біліктілігін саралап, бос жұмыс орындарын ұсынуға тиіс.

Ал жұмысынан айырылғандарға берілетін әлеуметтік төлемнің мерзімі әзірге өзгермейді. Оны ең көбі үш айға дейін қысқартатын жаңа тәртіп 2027 жылғы 1 қаңтардан күшіне енеді.

WhatsApp Business тарифі өзгереді

1 қазаннан WhatsApp Business API арқылы клиенттеріне хабарлама жіберетін кәсіпкерлер үшін тарифтік санат өзгереді. Дереккөздегі мәлімет бойынша, тапсырыс мәртебесі, жазылу туралы еске салу, түбіртек секілді қызметтік хабарламалардың бағасы 0,0077 доллардан 0,018 долларға дейін өседі.

Әр WhatsApp Business API нөміріне айына клиенттерге берілетін мың жауап тегін болады. 1001-жауаптан бастап әр жеткізілген хабарламаға 0,018 доллар төленеді. Бұл өзгеріс жеке хат алмасатын қарапайым WhatsApp қолданушыларына қатысты емес.

Алматыда су қымбаттайды

1 қазаннан Алматы тұрғындары үшін бір текше метр судың тарифі ҚҚС-пен 178,06 теңге, ал кәріз қызметі 119,46 теңге болады.

«Алматы су» тарифтің өсуін электр энергиясы, реагенттер, материалдар, қосалқы бөлшектер мен жабдық бағасының қымбаттауымен, сондай-ақ еңбек шығынының артуымен түсіндіреді. Соңғы екі жылда кәсіпорын теңгеріміне жалпы құны 73,2 млрд теңге болатын жаңа инфрақұрылым нысандары берілген.

Әлеуметтік төлем алушыларға хабарлама жіберіледі

1 қазаннан әлеуметтік төлем тағайындау шарттарындағы өзгерістер туралы азаматтарға кезең-кезеңімен хабар беріле бастайды. Ақпарат SMS, eGov Mobile және банктердің қосымшалары арқылы жеткізіледі.

Бұл әлеуметтік көмектің жаңа шарттары 1 қазаннан бірден қолданыла бастайды дегенді білдірмейді. Әзірге халықты хабардар ету және жаңа тәсілге көшуге дайындық жүріп жатыр.

Қытаймен шекарадағы автомобиль өткізу бекеттері үш күн жабылады

1–3 қазанда Қазақстан–Қытай шекарасындағы автомобиль өткізу бекеттері арқылы адамдар, көлік пен жүк өткізілмейді. Бұған Қытай Халық Республикасының құрылған күніне байланысты мереке себеп. Теміржол өткізу бекеттері қалыпты жұмысын жалғастырады.

Міндетті медициналық тексеру тәртібі өзгереді

3 қазаннан қызметкерлерді міндетті медициналық тексеруден өткізу ережелері жаңарады. Өзгерістер зиянды немесе қауіпті жағдайда жұмыс істейтін қызметкерлерге, кәсіби ауруға күдік туған кездегі тексеруге және медициналық қорытындыларды рәсімдеуге қатысты.

Зиянды немесе қауіпті еңбек жағдайында кемінде сегіз жыл жұмыс істеген кей қызметкерлер арнайы медициналық тексеруден бес жылда бір рет өтеді. Кәсіби ауру белгісі байқалса, қызметкер қосымша тексеруге жіберіледі.

Тоқаев Қазақстан халқына Жолдау жасайды

Президент Қасым-Жомарт Тоқаев қазан айында Қазақстан халқына жыл сайынғы Жолдауын жариялайтынын бұған дейін хабарлаған. Президенттің айтуынша, онда алдағы кезеңге арналған мақсат-міндеттер айқындалады.

Қауіпсіздік кеңесі әскерді реформалау жоспарын қарайды

Қазанның екінші жартысында Қауіпсіздік кеңесінде Қарулы күштерді реформалау жоспары қаралуы тиіс. Жоспарды Қауіпсіздік кеңесінің аппараты мен Қорғаныс министрлігі әзірлейді. Бұл тапсырма Каспийдегі әскери оқу-жаттығуда 14 әскери қызметші қаза тапқаннан кейін берілген.

Республика күнінде үш күн демалыс болады

Биыл 25 қазан – Республика күні жексенбіге түседі. Сондықтан демалыс дүйсенбі, 26 қазанға ауыстырылады. Бес күндік жұмыс аптасымен істейтін қазақстандықтар 24, 25 және 26 қазанда, яғни қатарынан үш күн демалады.