Қазақстанның ақылы автожолдарында орташа жылдамдықты бақылайтын камералар көбейеді

Қазақстанда жол-көлік оқиғаларының алдын алу мақсатында республикалық маңызы бар ақылы автожолдарға орташа жылдамдықты тіркейтін камералар орнату жалғасуда. Бұл туралы Үкімет отырысындағы брифингте Көлік министрлігі Автомобиль жолдары комитеті төрағасының орынбасары Маяқсат Бахмет мәлімдеді.

Аталған жүйені еліміздегі жалпы ұзындығы 4,9 мың шақырымды құрайтын ақылы жол учаскелеріне толықтай енгізу жоспарланып отыр. Жауапты маманның айтуынша, басымдық берілетін негізгі бағыттар қатарында мына тасжолдар бар:

 Қарағанды – Алматы;

 Өскемен – Талдықорған;

 Қорғас – Алматы.

Маяқсат Бахметтің сөзінше, орташа жылдамдықты бақылау жүйесін қолдану жол қауіпсіздігін арттыруда өз нәтижесін беруде. Атап айтқанда, осындай камералар орнатылған учаскелерде жол-көлік оқиғаларының деңгейі 15%-ға төмендеген.

Естеріңізге сала кетейік, Премьер-Министр Олжас Бектенов бұған дейін берген тапсырмасында қазіргі таңда республикалық маңызы бар 10 учаскеде орташа жылдамдықты бақылау жүйесі толыққанды жұмыс істеп тұрғанын хабарлаған болатын. Сонымен қатар, тағы 8 тасжолда камераларды іске қосу бойынша іске қосу-реттеу жұмыстары жүргізілуде.

Бұл бастама еліміздегі тасжолдардағы тәртіпті күшейтіп, жүргізушілердің жауапкершілігін арттыруға бағытталған маңызды қадам ретінде қарастырылуда.