Қазақстанда латын қарпіндегі маңдайшаларға уақытша тыйым салынды: себебі неде?

Елдегі мемлекеттік мекемелер мен жекеменшік кәсіпорындарға латын графикасымен жазылған көрнекі ақпараттар мен маңдайшаларды, билбордтарды орнатуды уақытша тоқтата тұру ұсынылды. Бұл күтпеген шектеудің артында не тұрғанын Ғылым және жоғары білім министрлігі түсіндірді.

Қазіргі уақытта Ахмет Байтұрсынұлы атындағы Тіл білімі институтының, «Тіл-Қазына» ұлттық ғылыми-практикалық орталығының ғалымдары мен жоғары оқу орындарының лингвист мамандары қазақ тілінің латын графикасына негізделген жаңа әліпбиі мен орфографиялық ережелерін әлі де жетілдіріп жатыр. Айта кету керек, бұған дейін латын әліпбиіне өтуге бөлінген қаржының басым бөлігі жұмыс жоспарларының өзгеруіне байланысты бюджетке кері қайтарылған болатын. Ендігі қосымша қаржыландыру тек нормативтік-құқықтық актілер толық бекітілгеннен кейін ғана бөлінбек.