Қазақстанда қай мамандарға сұраныс жоғары және кімдер ең көп жалақы алады?

Қазақстанның электронды еңбек нарығында мамыр айында 86,7 мыңнан астам бос жұмыс орны жарияланып, 91,6 мың адам жұмыс іздеуші ретінде түйіндемесін орналастырған.

Еңбек және халықты әлеуметтік қорғау министрлігінің мәліметінше, жұмыс берушілер ең жоғары жалақыны өндіруші өнеркәсіптегі өндіріс басшысының орынбасарына ұсынған. Бұл лауазым бойынша еңбекақы 1,45 млн теңгені құрайды. Сондай-ақ бас дәнекерлеушіге – 1,24 млн теңге, ақпараттық қауіпсіздік инженеріне 1,23 млн теңге көлемінде жалақы белгіленген.

Ал жұмыс іздеушілер арасында ең жоғары жалақыға үміткерлер қатарында кеме капитандары тұр. Олар 8,7 млн теңге көлемінде еңбекақы күтетінін көрсеткен. Бұдан бөлек, басшы орынбасарлары 3,7 млн теңге, ал ұшқыштар 2,8 млн теңге жалақы сұраған.

Сала бойынша қарағанда, кадрларға ең үлкен сұраныс білім беру жүйесінде сақталып отыр. Бір ай ішінде бұл бағытта 14 мың вакансия жарияланған. Қызмет көрсету саласында 12 мың, денсаулық сақтау және әлеуметтік қызмет көрсету секторында 8,6 мың, құрылыс саласында 8 мың, ауыл, орман және балық шаруашылығында 7,5 мың, ал өңдеу өнеркәсібінде 6,9 мың бос жұмыс орны тіркелген.

Өңірлер арасында жұмыс күшіне сұраныс Астана мен Алматы қалаларында, сондай-ақ Павлодар, Түркістан және Атырау облыстарында жоғары болған.

Еңбек биржасында түйіндеме жариялағандардың басым бөлігін 35 жасқа дейінгі азаматтар құраған. Вакансиялардың 43 пайызы орта білікті мамандарға арналған. Төмен білікті қызметкерлерге сұраныс 31 пайызды құраса, жоғары білікті кадрларға арналған ұсыныстардың үлесі 26 пайыз болған.