Қазақстанда автокөлік салығы қалай өзгереді: Жаңа Салық кодексіндегі басты жаңалықтар

Қазақстанда жаңа Салық кодексі аясында жеңіл автокөліктерге салынатын салықты есептеу тәртібіне үлкен өзгерістер енгізілуде. Бұл реформаның басты мақсаты - әлеуметтік әділдікті орнатып, ескі көлігі бар азаматтардың шығынын азайту және қымбат «люкс» санатты машиналарға салық жүктемесін арттыру,деп хабарлайды Inform buro.

Жаңа жүйенің ең басты жаңалығы- автокөліктің пайдаланылған мерзіміне (шыққан жылына) қарай жеңілдіктер беру. Енді көлік неғұрлым ескі болса, оның иесі соғұрлым аз салық төлейді. Нақтырақ айтсақ, қолданыста жүргеніне 10 жылдан 20 жылға дейін болған көліктердің салығы 30%-ға (коэффициент 0,7) төмендесе, 20 жылдан асқан «тұлпарлардың» салығы екі есеге (коэффициент 0,5) азаяды. Бұл жеңілдік әсіресе қозғалтқыш көлемі үлкен, бірақ ескірген көлік мінетін азаматтар үшін үлкен қолдау болмақ.

Сонымен қатар 2026 жылдың 1 қаңтарынан бастап қозғалтқыш көлемі үлкен көліктерге арналған жаңартылған мөлшерлемелер күшіне енеді. Мәселен, көлемі 3-тен 4 литрге дейінгі көліктер үшін негізгі мөлшерлеме 15 АЕК (64 875 тг) болып бекітіліп, оған көлемнің әр бірлігі үшін қосымша төлем қосылады. Ал 4 литрден асатын темір тұлпарларға салынатын салық 117 АЕК-тен (506 025 тг) басталып, көлеміне қарай өсе береді. Айта кетерлігі, бұл жоғары мөлшерлемелерге де көліктің жылына байланысты 30% немесе 50% жеңілдіктер қолданылатын болады.

Реформаның тағы бір маңызды тұсы - «сән-салтанат салығының» енгізілуі. Енді құны 18 000 АЕК-тен (шамамен 77,85 млн теңгеден) асатын аса қымбат көліктерге 10% мөлшерінде акциз салынады. Бұл төлем көлік елге алғаш әкелініп тіркелгенде де, кейіннен ішкі нарықта қайта сатылғанда да міндетті түрде өтелуі тиіс.

Қорыта айтқанда, жаңа салық саясаты қарапайым халықтың қалтасына түсетін салмақты жеңілдетуді көздейді. Ескі көлік иелерінің салығы азайса, су жаңа әрі қымбат «люкс» көлік мінетіндер мемлекет қазынасына көбірек үлес қосатын болады.