Қасым-Жомарт Тоқаев: Жаңа Конституция – әділдік пен технологиялық прогрестің берік негізі

Қазақстан Президенті Қасым-Жомарт Тоқаев еліміздің саяси трансформациясындағы шешімшіл кезең - жаңа Конституцияның қабылдануы мен оның мемлекет дамуындағы стратегиялық маңызы туралы мазмұнды мақаласын жариялады.

Мемлекет басшысы жуырда өткен республикалық референдум нәтижелерін ұлттың жаңа сапалық деңгейге көтерілуінің айқын көрінісі деп атап, бұл оқиғаны Тәуелсіздіктің 35 жылындағы ең елеулі белес ретінде сипаттады. Референдумға дауыс беру құқығы бар халықтың 73,12 пайызы қатысып, олардың 87,15 пайызы конституциялық өзгерістерді қолдауы - қоғамның саяси жүйені жетілдіруге деген шынайы дайындығын және мемлекет болашағына деген жауапкершілігін көрсететін рекордтық көрсеткіш болып табылады.

Жаңа Ата заң «Күшті Президент - ықпалды Парламент - есеп беретін Үкімет» формуласын іс жүзінде бекітіп, Президент квотасын алып тастау арқылы заң шығарушы биліктің дербестігін күшейтті. Бір палаталы парламент жүйесіне (Құрылтайға) көшу заң шығару үдерісін жеделдетсе, жаңадан құрылған Халық кеңесі мен Вице-президент лауазымы ел басқару жүйесінің кемелденгенін айғақтайды.

Президент Ата заңның өзегі адам екенін баса айтып, құжаттың ең үлкен бөлімі алғаш рет адам құқықтары мен бостандықтарына арналғанын жеткізді. Жаңа жүйеде адамның жеке басына қол сұғылмаушылығына, дербес деректердің қорғалуына және сот шешімінсіз баспанадан айырмауға мемлекеттік кепілдік берілген. Ендігі кезекте Конституцияға енгізілетін кез келген өзгеріс тек жалпыхалықтық референдум арқылы ғана жүзеге асатыны - ел тағдырын халықтың өзі айқындайтынының кепілі. Сонымен қатар мақалада Қазақстанның инвестициялық тартымдылығы мен инновациялық әлеуетіне ерекше тоқталған. Қазақстан Орталық Азияға келген инвестицияның 70 пайызын иеленіп, аймақта көш бастап тұрғанын айтқан Мемлекет басшысы, зияткерлік меншікті қорғау және «қарқынды дамитын қала»  құқықтық режимдері цифрлық елге айналу үдерісін жеделдететінін атап өтті.

Бүгінде еліміз Орта дәліз аясында жаңа сауда бағыттарын дамытып, аймақтағы ең қуатты суперкомпьютерді іске қосу және қазақ тілінің үлкен тіл моделін жасау сияқты озық технологиялық жобаларды қолға алды. Осы тарихи таңдаудың құрметіне 15 наурыз - Конституция күні болып белгіленді. Қасым-Жомарт Тоқаевтың пайымдауынша, жаңа Конституция - келешекке қол созған, әділдік пен технологиялық прогресті ту еткен қуатты мемлекеттің басты құжаты болып қала бермек.