Қарызды кешіру және тексерісті тоқтату: Шағын бизнес үшін жаңа ережелер күшіне енеді

Қазақстан Үкіметі микро және шағын кәсіпкерлік субъектілері үшін салықтық әкімшілендіруді түбегейлі жеңілдетуге бағытталған ауқымды шешім қабылдады. Жаңа ережелерге сәйкес, 2026 жылдың 1 қаңтарына дейін жиналған салықтық берешектерін 1 сәуірге дейін өтеген кәсіпкерлердің өсімпұлдары мен айыппұлдары толықтай кешіріледі.

Сонымен қатар ҚҚС бойынша тіркеуге кеш тұрғаны үшін салынған айыппұлдар да жойылатын болды. Тиісті ережелер жобасы 12 қаңтарда «Ашық НҚА» порталында жарияланып, биылғы ақпан айының басында күшіне енеді деп жоспарлануда.

Бұл реформа аясында бақылау шаралары да айтарлықтай шектеледі: 2025 жылғы 17 желтоқсанға дейін тапсырылған есептер бойынша камералдық бақылау тоқтатылып, өткен кезеңдерге қатысты жаңа салықтық тексерістер тағайындалмайды. Тек қылмыстық істер, прокуратура талаптары немесе кәсіпкерлердің өз өтініштері бойынша ғана ерекше жағдайлар қарастырылған. Сонымен қатар 2026 жылдың 1 қаңтарынан бастап ҚҚС-қа тіркелу мерзімін өткізіп алғандарға немесе есепті кешіктіргендерге әкімшілік іс қозғау тоқтатылады.

Премьер-министр Олжас Бектеновтың тапсырмасымен қазіргі уақытта 2026 жыл бойы шағын бизнеске мүлдем айыппұл мен өсімпұл есептемеу мүмкіндігі қарастырылуда, бұл кәсіпкерлерге өткендегі қателіктерді түзеп, жұмысты «таза парақтан» бастауға жол ашады.