JET самокаттарын пайдалануға жаңа талаптар енгізіледі

Қазақстандағы ең ірі кикшеринг операторларының бірі – JET компаниясы пайдаланушылар үшін міндетті түрде ЖСН (ИИН) арқылы верификациядан өту қажеттілігін жариялады. Бұл шара кәмелетке толмаған тұлғалардың, соның ішінде мектеп оқушыларының сервис мүмкіндіктерін қолдануын шектеуге бағытталған, деп хабарлайды Kursiv.kz

2026 жылғы 1 шілдеден бастап электросамокаттарды басқаруға қатысты жол қозғалысы ережелеріне түзетулер күшіне енеді. Жаңа талаптарға сәйкес:

Сервисті пайдалану жасы 18-ден жоғары деп белгіленді.

Электросамокатпен жолдың оң жақ шетімен жүру үшін жүргізуші куәлігінің кез келген санаты талап етіледі.

Веложолақтар, велосипед жолдары, жол жиектері және тротуарлармен жүрген жағдайда жүргізуші куәлігі қажет емес.

Верификация процесі қалай жүреді?

Пайдаланушылар JET қосымшасының бас бетіндегі «Профильді растау» бөлімі арқылы ЖСН мен телефон нөмірін енгізуі тиіс. Жүйе автоматты түрде азаматтың жасын және жүргізуші куәлігінің бар-жоғын анықтайды.

Компанияның бас цифрлық офицері (CDO) Иван Булгаковтың айтуынша, процесс толығымен автоматтандырылған және мемлекеттік ақпараттық жүйелермен қорғалған шлюздер арқылы интеграцияланған. Сондай-ақ, оператор пайдаланушылардың деректерін жинамайтынын және сақтамайтынын, барлық тексеру жұмыстары шифрланған режимде жүретінін атап өтті.

Жаңа ережелердің күшіне енуімен самокат жүргізушілері өзге көлік жүргізушілерімен тең дәрежеде әкімшілік жауапкершілікке тартылады. ЖСН арқылы верификациялау полиция қызметкерлеріне жүргізушінің жасын және оның құжаттарының жарамдылық мерзімін жедел тексеруге мүмкіндік береді.