Еуропаға баратын қазақстандықтарды енді не күтіп тұр

Қазақстан Республикасының Сыртқы істер министрлігі Шенген аймағына кіру ережелерінің өзгергенін хабарлайды. Шенген аймағына мүше 29 мемлекетте үшінші елдердің азаматтары үшін шекарадан өтуді автоматтандырылған цифрлық есепке алудың EES (Entry/Exit System) жүйесі толыққанды іске қосылды. Бұл туралы Қазақстан Республикасы Сыртқы істер министрлігі ресми мәлімдеме жасап, отандастарымызды жаңа талаптармен танысуға шақырады.

Жаңа жүйе шекарадан өту кезінде төлқұжатқа қолмен штамп басу процедурасын толығымен алмастырады. Енді Шенген аймағындағы кез келген елге алғаш рет кірген кезде шетелдік азаматтардан міндетті түрде мынадай мәліметтер жиналады:

 Жеке төлқұжат деректері;

 Биометриялық көрсеткіштер (бет-әлпет кескіні мен саусақ іздері);

 Кіру және шығу күні мен орны.

Бұл деректер бірыңғай жүйеде 3 жыл бойы сақталады. Сондай-ақ, жүйеде тұлғаға елге кіруден бас тартылған жағдайлар да тіркеледі. Ресми ережеге сәйкес, 12 жасқа толмаған балалардан саусақ іздері алынбайды.

Сыртқы істер министрлігінің түсіндіруінше, жаңа процедура тұлғаны кескін бойынша сәйкестендіруді қарастырады және болашақта шекарадан өту үдерісін жеңілдетуге бағытталған. Алайда, биометриялық деректерді ұсынудан бас тартқан жағдайда, шетелдік азаматтың Шенген аймағына кіруіне тыйым салынады.

Жүйені енгізудің алғашқы кезеңінде шекаралық бақылау бекеттерінде, әсіресе алғашқы кіру пунктінде құжаттарды тексеру уақыты ұзаруы мүмкін. Осыған байланысты, СІМ өкілдері транзиттік бағыттармен саяхаттайтын жолаушыларға рейстер арасындағы ауысып отыру уақытын қосымша уақыт қорымен жоспарлауды ұсынады.

Шекарадан өту үдерісін жеделдету мақсатында Еуропалық Одақ арнайы мобильді қосымша әзірледі. Жолаушылар келуге 72 сағат қалғанда өздерінің төлқұжат деректері мен биометриялық суреттерін осы қосымшаға алдын ала жүктей алады. Дегенмен, мобильді қосымшаны пайдалану азаматтарды тікелей шекаралық бақылаудан өту міндетінен босатпайды.

ҚР СІМ вице-министрі Әлібек Бақаев БАҚ өкілдеріне берген сұхбатында атап өткендей, жүргізіліп жатқан жұмыстар қазақстандықтарды Шенген визасынан толық босатуды емес, оны алу процедураларын жеңілдетуді көздейді. Қазақстан тарапы Шенген елдерімен бұл бағыттағы ресми келіссөздерді 2026 жылдың екінші жартысында аяқтауды жоспарлап отыр.