Энергетика министрлігі мұнай өндірісінің неге азайғанын түсіндірді

Каспий құбыр консорциумының Қара теңіздегі айлағында мұнай тиеу уақытша тоқтатылды. Мұндай шешім кемелердің, олардың экипаждарының қауіпсіздігін және теңіз айдынындағы экологиялық жағдайды қорғау үшін қабылданған, деп хабарлады Қазақстанның Энергетика министрлігі.

Ведомствоның мәліметінше, КҚК-ның барлық нысаны қалыпты тәртіппен жұмыс істеп тұр. Консорциум жағдай тұрақталғаннан кейін мұнайды танкерлерге тиеуді дереу қайта бастауға дайын.

Құбыр жүйесіне мұнай қабылдауға шектеу қойылғандықтан, өндіруші компаниялар тәуліктік өндіріс көлемін уақытша азайтқан. Министрлік бұл шараның технологиялық сипатта екенін және мұнай сақтайтын ыдыстардың толып кетуіне жол бермеу үшін қажет болғанын атап өтті.

Энергетика министрлігі КҚК басшылығымен, мұнай жөнелтушілермен, кеме иелерімен және мемлекеттік органдармен тұрақты байланыста екенін хабарлады. Қазір тараптар Қара теңіздегі қауіпсіз кеме қатынасын қалпына келтіру және Қазақстан мұнайының экспортын мүмкіндігінше тез қайта бастау шараларын талқылап жатыр.

Бұған дейін Reuters агенттігі Қазақстанда мұнай өндіру көлемі төмендегенін хабарлаған еді. Агенттік дерегінше, Теңіз кен орнындағы тәуліктік өндіріс 925 мың баррельден 406 мың баррельге дейін азайған.