Египетке ұшуға бола ма: Сыртқы істер министрлігі жауап берді

Қазақстанның Сыртқы істер министрлігі азаматтарды Таяу Шығыс елдеріне, оның ішінде Египетке сапарлаудан уақытша бас тартуға шақырды. Бұл туралы ведомствоның ресми өкілі Ерлан Жетібаев мәлімдеді.

Оның айтуынша, мемлекет азаматтардың шетелге шығуына тыйым сала алмайды, алайда қауіпсіздікке байланысты ұсыныс беруге құқылы.

– Бұл жағдайда біз Таяу Шығыс елдеріне сапардан уақытша бас тартуға кеңес береміз. Иә, біз кейбір елдер, соның ішінде Египет туристерді қабылдап жатқанын білеміз, рейстер де қалыпты режимде орындалып жатыр. Дегенмен өңірдегі жағдайдың дамуын ескере отырып, азаматтарды шетелге шығу мәселесіне жауапкершілікпен қарауға шақырамыз. Егер мүмкіндік болса, бұл елдерге сапарды уақытша кейінге қалдырған жөн. Қауіпсіздік – бәрінен маңызды, – деді Ерлан Жетыбаев.

Сонымен бірге 3 наурызда қазақстандық SCAT әуе компаниясы Египетке рейстер бекітілген және қауіпсіз әуе дәліздері арқылы орындалып жатқанын хабарлады. Компания мәліметінше, ұшақтар аймақтағы қақтығыс аймақтарын айналып өтетін маршруттармен ұшады. Шарм-эш-Шейхте туристік маусым жалғасып жатыр, қонақүйлер де туристерді әдеттегі режимде қабылдауда.

Айта кетейік, 28 ақпанда Израиль мен АҚШ Иран аумағына соққы жасаған. Бұған жауап ретінде Иран Таяу Шығыстағы алты мемлекетке, оның ішінде Біріккен Араб Әмірліктері мен Қатарға зымыран шабуылдарын жасағаны хабарланды.

Осы жағдайға байланысты Қазақстанның авиациялық әкімшілігі Иран, Израиль, Сирия, Ирак, Иордания және Ливан әуе кеңістігінің үстімен, ішінде немесе оған жақын бағыттармен ұшуға толық тыйым салды.