«Домбыра шариғатқа қайшы ма?»: ҚМДБ түсініктеме берді

Ұлттық домбыра күні қарсаңында Қазақстан мұсылмандары діни басқармасының ресми сайтында Алматы қаласының бас имамы Төлеби Оспанның домбыра мен музыкаға қатысты түсіндірмесі жарияланды.

Бас имам соңғы уақытта кейбір адамдардың қазақтың ұлттық аспабы – домбыраны шариғатқа қайшы деп бағалайтынын айтып, мұндай пікірдің діни негізі жоқ екенін жеткізді. Оның айтуынша, исламда музыкаға қатысты түрлі риуаяттар бар және оларды біржақты түсіндіруге болмайды.

Мақалада Пайғамбар Мұхаммедтің (с.ғ.с.) тойдағы ән мен ойын-сауыққа қатысты хадистері, сондай-ақ ислам ғұламаларының пікірлері келтірілген. Онда ізгілікке, адамгершілікке, имандылыққа және отансүйгіштікке үндейтін ән-күйге шариғат тыйым салмайтыны айтылған.

Сонымен қатар Төлеби Оспан Ислам ғалымдарының еңбектеріне сүйене отырып, музыканың үкімі оның мазмұны мен мақсатына байланысты екенін атап өтті. Адамды жамандыққа, әдепсіздікке үндейтін әндерге тыйым салынғанымен, тәрбиелік әрі рухани мәні бар шығармаларға рұқсат берілгенін жеткізді.

Бас имамның айтуынша, қазақ халқы ғасырлар бойы домбыраны елдікке, имандылыққа, адамгершілікке және Отанды қорғауға үндейтін құрал ретінде пайдаланып келген. Сондықтан домбыра – халқымыздың рухани мұрасы мен ұлттық болмысының ажырамас бөлігі.