Депутат көше атауын Әлия Молдағұлова деп өзгертуге қарсы шықты

Қостанай облысының Рудный қаласында Иван Франко және 50 лет Октября көшелерінің атауын өзгерту мәселесі талқыланды. Тұрғындар бірінші көшеге Кеңес Одағының Батыры Әлия Молдағұлованың, екінші көшеге Достық атауын беруді ұсынған. 

21 қарашада өткен дауыс беруді 12 депутаттың 11-і көше атауларын қазақша атауға ауыстыруды қолдап дауыс берген. Алайда "Amanat" партиясының депутаты, “КРЦ “ГОРНЯК” компаниясының директоры Валерий Гирфанов көше атауын қазақша атауға қарсы дауыс берген. 

Тыңдау барысында жергілікті тұрғын Екатерина Корчагинаның сөзі қызу пікірталас тудырды. Ол көшелерде Кеңес дәуіріндегі атауларды сақтауды қолдады. Тіпті,  "регламентке түкіргенім бар",- деп қатты айтқан. Регламентті бұзғаны үшін ол отырыстан шығарылып, кейін мәслихат төрағасы полицияға арыз түсірді.

Желі қолданушылары Корчагинаның және депутат Гирфановтың ұстанымын сынға алды. Журналистер мен қоғам белсенділері қазақша атауларды қайтару — тарихи әділдік екенін айтты.

Алдағы шешімді Республикалық ономастикалық комиссия бекітеді.