Burger King-тегі жағдай: Еңбек министрлігі тексеріс жүргізуде

Қазақстан Республикасының Еңбек және халықты әлеуметтік қорғау министрлігі Burger King Kazakhstan желісінде аутизм спектрі бұзылысы бар қызметкер Әлібек Қаратайға қатысты жағдайды бақылауға алғанын мәлімдеді.

Министрлік мәліметінше, Алматы қаласының мемлекеттік еңбек инспекторы Әлібек Қаратайдың үйіне барып, оның әкесіне еңбек заңнамасына сәйкес өтінішті қалай дұрыс беру керектігін түсіндірген. Сондай-ақ қолданыстағы заңнамада көзделген кепілдіктер туралы ақпарат берілген.

Ведомствоның хабарлауынша, жұмыс беруші – «QSR» ЖШС (Burger King) ұйымында қызметтік тексеру жүргізілуде. Тексеру кезеңінде басшылардың бірі уақытша қызметінен шеттетілген.

Бұған дейін әлеуметтік желілерде қызметкердің анасы ұлын жұмыстан кетуге мәжбүрлеу мақсатында қысым көрсетілгенін мәлімдеген еді. Оның айтуынша, Әлібек шамамен төрт жыл бойы желідегі мейрамханалардың бірінде аспаз болып жұмыс істеген, алайда соңғы уақытта оған қатысты «қудалау» әрекеттері орын алған.

Компания өкілдері бұл айыптауларға жауап ретінде қызметкердің жұмыстан шығарылмағанын, мәселені реттеу үшін өзге мейрамханаға ауыстыру мүмкіндігін қоса алғанда бірқатар ұсыныстар жасалғанын және қызметкер мен оның отбасымен диалогқа дайын екенін хабарлады.