Бес лауазымды тұлғамен шектелмейді: Каспийдегі қайғылы оқиға бойынша тергеу жалғасып жатыр

Каспий теңізіндегі оқу-жаттығу кезінде әскери қызметшілердің қаза табуына қатысты іс бойынша тергеу жалғасып жатыр. Құқық қорғау органдары іске қатысы болуы мүмкін басқа адамдарды анықтап, оларды ұстау шараларын жүргізіп жатыр, деп хабарлады Ішкі істер министрлігі.

«Іске қатысы бар басқа да тұлғалардың шеңберін анықтап, оларды ұстау мақсатында тергеу жалғасуда», – делінген ІІМ таратқан қосымша мәліметте.

Бұған дейін осы іс бойынша Қорғаныс министрлігі жүйесіндегі бес лауазымды тұлға ұсталғаны хабарланды. Олардың арасында Әскери-теңіз күштері Бас қолбасшысының бірінші орынбасары – штаб бастығы, екі әскери бөлімнің командирі, теңіз жаяу әскерлері ротасының және «Қайсар» катерінің командирлері бар.

Олар қызметке салғырт қарау және корабль жүргізу қағидаларын бұзу салдарынан ауыр зардаптарға әкеп соққан қылмыстық құқық бұзушылықтарды жасады деген күдікке ілінген. Бесеуі де күдікті деп танылып, Ақтау қаласы Полиция басқармасының уақытша ұстау изоляторына қамалды.