Баласын ит талап өлтірген әке қаңғыбас иттерге қатысты заңды күшейтуді сұрайды

Ақтөбе облысында бірнеше жыл бұрын болған қайғылы оқиғаның жарасы әлі жазылған жоқ. 13 жастағы ұлынан айырылған Отарбек Әбшанов қаңғыбас иттер мәселесінің әлі де шешімін таппай отырғанын айтып, дабыл қақты. Бала ойынға шығып кетіп, үйіне қайта оралмаған.

Әкенің айтуынша, бәрі мектеп чатындағы хабарламадан басталған. Полиция көрсеткен бейнежазбада алдымен күшіктерін қызғанған бір ит шабуылдап, артынша оған тағы 3-4 ит қосылып, баланы топ болып талап тастаған. Сұмдық оқиға небәрі бірнеше секундтың ішінде болып, жасөспірім алған жарақаттарынан оқиға орнында тіл тартпай кеткен.

Отарбек Әбшанов бұл қайғыдан кейін де өңірде ит талаған балалар мен психологиялық соққы алған бүлдіршіндердің саны азаймай тұрғанын айтады. Оның пікірінше, бұл — жауапкершіліктің жоқтығы мен бақылаудың әлсіздігінен туындаған жүйелі дағдарыс.

«Ең басты құндылық - адам өмірі болуы керек», — дейді қара жамылған әке.

Қазіргі уақытта Мәжілісте жануарларға жауапкершілікпен қарау туралы заң қайта қаралып жатыр. Күн тәртібінде иесіз жануарларды уақытша оқшаулау, тіпті агрессивті иттерге эвтаназия (ұйықтату) қолдану туралы өткір ұсыныстар бар. Ақтөбедегі ахуал қала тұрғындарының әлі де қорқынышпен өмір сүріп жатқанын көрсетіп отыр.