Астанадағы ЛРТ станцияларының толық тізімі жарияланды

Астана қаласының Геопортал мәліметтеріне сәйкес, жеңіл рельсті көлік (LRT) жобасының ескі теміржол вокзалына дейінгі бағыты мен станциялар тізімі анықталды. Жаңа бағыттың жалпы ұзындығы 8 шақырымды құрайды және оның бойында 9 тоқтау аялдамасы орналасады.

Станциялардың орналасу тізбегі

Жобалық құжаттамаға сәйкес, желі келесі нысандардың маңынан өтеді:

• Диагностикалық орталық

• «Сарыарқа» сауда-ойын-сауық орталығы

• «Керуен сити» сауда орталығы

• Сағатты сквер (Орталық парк маңы)

• Қ. Мұңайтпасов атындағы стадион

• ҚР Қаржы министрлігі

• Қазақ ұлттық өнер университеті

• С. Сейфуллин атындағы Агротехникалық университет

• Астана қаласының ескі теміржол вокзалы

Қазіргі уақытта жобаны іске асырудың негізгі кезеңдері аяқталуға жақын. Желіде жалпы саны 18 пойыз қызмет көрсетеді деп жоспарлануда. Көліктің максималды жылдамдығы сағатына 80 шақырымды құрап, қозғалыс интервалы 3,5 минут деңгейінде сақталады.

Мамандардың есептеуінше, ЛРТ жүйесі қала ішіндегі жолаушылар тасымалының жылдамдығын өзге көлік түрлерімен салыстырғанда екі есеге арттырады. Бір құрам бір уақытта 600 жолаушыға дейін тасымалдауға қауқарлы.

Бүгінгі таңда «Абу-Даби Плаза», Ботаникалық бақ, «Астана Арена» және Халықаралық әуежай бағытындағы негізгі станциялар дайындық деңгейінде. Бекеттер маңындағы аумақтарды асфальттау және жаяу жүргіншілер жолдарын ретке келтіру жұмыстары ағымдағы жылдың жаз маусымының соңына дейін аяқталады.

Сонымен қатар 2027 жылға қарай желіні Қосшы елді мекеніне дейін ұзарту жоспарланып отыр.