«AMANAT» фракциясы шетелдік қаржыландыруды бақылауды күшейтуді ұсынады

«AMANAT» партиясының депутаты Ж. Амантайұлы Мәдениет және ақпарат министрі Аида Балаеваға жолдаған депутаттық сауалында үкіметтік емес секторға бөлінетін шетелдік гранттарды қадағалау механизмін түбегейлі жетілдіруді талап етті.

Депутат қазіргі заңнамалық тетіктердің мемлекеттік мүддені қорғауға және сыртқы ықпалды толық бақылауға жеткіліксіз екенін мәлімдеді. Талдау нәтижесінде салық органдарының қаржы ағынын толыққанды қадағалауға құқықтық мүмкіндігі шектеулі екені анықталды. Атап айтқанда, заң бойынша ұйымдар тек қызметтің үш түрі - заң көмегі, социологиялық зерттеулер және ақпарат тарату - бойынша ғана есеп береді. Ал бұл тізімге кірмейтін, соның ішінде қайырымдылық желеуімен жүзеге асырылатын басқа да жобалар мемлекеттік бақылаудан тыс қалып отыр.

Банк құпиясы туралы нормалар салық органдары мен қаржылық мониторинг агенттіктері арасындағы ақпарат алмасуды шектеп, қаражат қозғалысын нақты бақылауға кедергі келтіруде. Қазіргі кезде жарияланып жүрген тізілімдер нақты ахуалды толық көрсетпейді, ал Әкімшілік құқық бұзушылық туралы кодекстің 460-1-бабын қолдану тәжірибесі есептіліктің толық еместігін дәлелдеудің күрделілігіне байланысты тиімсіз. Нәтижесінде, мемлекеттік органдар отандық және халықаралық ұйымдардың шетелдік қаржыландырылуы туралы шынайы ақпаратқа ие емес.

Осы мәселелерді шешу үшін депутат келесі шараларды қабылдауды ұсынды:

1. Салық кодексінің 56-бабындағы шектеуші нормаларды алып тастап, ұйымдардың қызмет түріне қарамастан, шетелден келетін барлық қаржыландыруды толық бақылауға алу;

2. Мемлекеттік кірістер органдарының құзыретін кеңейту арқылы қаржылық мониторинг және банк қадағалауы органдарынан деректерді тұрақты негізде алу механизмін іске қосу;

3. Үкіметтік емес сектормен өзара іс-қимыл жасайтын уәкілетті органдар мен әкімдіктердің шетелдік жобаларды іске асыруды қадағалау өкілеттіктерін қайта қарау.