Алматыда жол-көлік оқиғалары ең көп тіркелген даңғыл белгілі болды

Алматы қаласының Полиция департаменті Informburo сауалына берген жауабында 2026 жылдың алғашқы бес айында жол-көлік оқиғалары ең көп тіркелген көше – Төле би даңғылы екенін мәлімдеді.

Ресми мәліметке сәйкес, аталған кезеңде Төле би даңғылында 160 жол апаты тіркеліп, салдарынан екі адам қаза тауып, 135 адам жарақат алған.

Жол-көлік оқиғаларының саны бойынша келесі орындарда:

• Абай даңғылы – 80 жол апаты, 88 адам зардап шеккен;
• Әл-Фараби даңғылы – 70 жол апаты, төрт адам көз жұмып, 75 адам жарақат алған.

Айта кетейік, 2026 жылдың бес айында Алматыда жалпы саны 2964 жол-көлік оқиғасы тіркелген. Нәтижесінде 22 адам қаза тауып, 3242 адам түрлі деңгейде жарақат алған.

Ал 2025 жылы қалада 7620 жол апаты болып, 73 адам қайтыс болған және 888 адам зардап шеккен. Сол жылы апаттар ең көп тіркелген даңғылдар мыналар болды:

• Абай даңғылы – 352 жол апаты, екі адам қаза тауып, 350 адам жарақат алған;
• Төле би даңғылы – 351 жол апаты, екі адам көз жұмып, 349 адам жарақат алған;
• Рысқұлов даңғылы – 190 жол апаты, бес адам қаза тауып, 207 адам зардап шеккен;
• Әл-Фараби даңғылы – 144 жол апаты, екі адам қаза тауып, 143 адам жарақат алған.

Полиция департаментінің мәліметінше, жол апаттарының негізгі себептері қатарында жылдамдықты шамадан тыс асыру, маневр жасау ережелерін бұзу, жаяу жүргіншілер өткелінен өту талаптарын сақтамау, қарсы қозғалыс жолағына шығу, сондай-ақ арақашықтық пен бүйірлік интервалды сақтамау бар.

Сонымен қатар 2025 жылы мас күйінде көлік басқарған жүргізушілердің кінәсінен 51 жол апаты болып, екі адам қаза тауып, 73 адам жарақат алған. Ал 2026 жылдың алғашқы бес айында мұндай тоғыз жол апаты тіркеліп, үш адам көз жұмып, 14 адам жараланған.