Алматыда ауқымды ALMATY GASTRO WEEK гастрономиялық фестивалі өтіп жатыр

Алматы қаласының Жібек жолы көшесінде қаланың жетекші 21 мейрамханасының басын біріктірген ALMATY GASTRO WEEK ауқымды гастрономиялық шарасы өз бастауын алды. Жоба аясында қала тұрғындары мен қонақтары өңірдегі үздік мейрамханалардың ұсынылған мәзірімен танысып, танымал шеф-аспаздардың кәсіби шеберлігін тамашалауға, сондай-ақ бай мәдени және ойын-сауық бағдарламасына қатысуға мүмкіндік алды.

Фестивальдің негізгі оқиғаларының бірі — Дубай қаласында орналасқан, Michelin жұлдызына ие «11 Woodfire» мейрамханасының бас аспазы Брандо Моростың арнайы шеберлік сабағы. Шара барысында халықаралық дәрежедегі сарапшы кулинария саласындағы заманауи тәсілдерді көрсетіп, авторлық рецепттер бойынша дайындалған тағамдарды таныстырды.

Ұйымдастырушылар жергілікті өнімдер мен шаһардың тарихи символикасын насихаттауға ерекше көңіл бөлген. Қаланың басты символы саналатын алманы қолдана отырып, Брандо Морос жасыл алма қосылған теңіз тарағынан жасалған севиче дайындады. Ерекше ингредиенттердің сәтті үйлесімі фестивальдің басты гастрономиялық жаңалығының біріне айналды.

Бұдан бөлек, шараның мәдени бағдарламасы аясында кәсіби бармен-шоу, «FAMOUS» Live Band музыкалық ұжымының өнер көрсетуі, арнайы DJ-сеттер, интерактивті ойындар мен «MAJESTIC SHOW» иллюзиялық бағдарламасы ұйымдастырылған. Фестивальдің салтанатты жабылуы аңызға айналған «Дос-Мұқасан» ансамблінің мерекелік концертімен түйінделеді.