Ақтөбеде Қорғаныс министрлігінің тұңғыш Дзюдо орталығы ашылды

Ақтөбе қаласындағы қос мәрте Кеңес Одағының Батыры Талғат Бигелдинов атындағы Әуе қорғанысы күштерінің әскери институтында Қазақстан Республикасы Қорғаныс министрлігі Спорт комитетінің алғашқы Дзюдо орталығы салтанатты түрде ашылды. Бұл жөнінде ведомствоның баспасөз қызметі хабарлады.

Салтанатты шараға Қорғаныс министрі авиация генерал-лейтенанты Дәурен Қосанов, Ақтөбе облысының әкімі Асхат Шахаров, Спорт комитетінің төрағасы – Армия орталық спорт клубының бастығы полковник Арман Әбеуов, сондай-ақ «Jenys» қорының негізін қалаушы Алмаз Әлсенов пен Халықаралық дзюдо федерациясының (IJF) өкілдері қатысты. Жаңа спорт нысанының ашылуы министрлік пен халықаралық федерация арасындағы ынтымақтастық меморандумын іске асырудың нақты нәтижесі болып табылады.

«Алғашқы Дзюдо орталығының ашылуы халықаралық ынтымақтастықты нығайту мен әскери қызметшілерді даярлаудың заманауи жүйесін қалыптастырудағы жаңа кезеңнің бастамасы болмақ. Бұл – жобаны кең ауқымда жүзеге асырудың алғашқы қадамы. Алдағы уақытта Қорғаныс министрлігінің барлық әскери жоғары оқу орындары мен колледждерінде осындай орталықтар ашуды жоспарлап отырмыз», – деді авиация генерал-лейтенанты Дәурен Қосанов.

Өңір басшысы Асхат Шахаров жаңа орталықтың қызметі аймақтағы дзюдо спортын дамытуға тың серпін беретініне сенім білдірді. Өз кезегінде полковник Арман Әбеуов әскери институтқа заманауи татамилерді, кимоно жиынтықтарын және қажетті спорттық жабдықтарды қайтарымсыз негізде берген «Jenys» қорына алғысын жеткізді. Сонымен қатар, ол әскери бөлімдер мен оқу орындарының командаларын біріктіретін Қазақстан Қарулы күштерінің Дзюдо лигасын құру және әскер спортына халықаралық білім беру жүйесін енгізу жоспарланып отырғанын мәлімдеді.