Ақтөбеде бір үйден әйел мен үш баланың мәйіті табылды

Ақтөбе қаласында жекеменшік үйлердің бірінен әйел мен үш баланың мәйіті табылды. Қайғылы оқиға 9 ақпанда Алматы ауданында болған. Бұл жөнінде облыс әкімдігінің баспасөз қызметі хабарлады.

Алдын ала мәліметке сәйкес, марқұмдар газ жабдығын дұрыс пайдаланбау салдарынан табиғи газға уланып көз жұмған болуы мүмкін. Алайда оқиғаның нақты себептері әзірге анықталып жатыр.

Облыс әкімінің тапсырмасымен жағдайды жан-жақты зерделеу үшін арнайы комиссия құрылған. Комиссияны Ақтөбе қаласының әкімі Азамат Бекет басқарады. Ол уәкілетті органдармен бірлесіп, тексеру жүргізіп, тергеу қорытындысы бойынша тиісті шаралар қабылдайды.

Құқық қорғау органдары аталған дерек бойынша тергеу амалдарын жүргізіп жатыр. Ақтөбе облысының әкімдігі қаза тапқандардың туыстары мен жақындарына көңіл айтып, жерлеу рәсімін ұйымдастыруға көмек көрсетілетінін, сондай-ақ қажетті материалдық және әлеуметтік қолдау берілетінін мәлімдеді.