Ақтөбеде 9 футболшы 110 млн теңгеге бәс тіккен: Бас прокуратура келісілген матчтар жайында айтты

Биыл көктемде Ақтөбе қаласында 9 футболшы жалпы сомасы 110 миллион теңгеге бәс тіккен. Бұл туралы бас прокурор Берік Асылов Мәжіліс депутаты Абзал Құспанның депутаттық сауалына берген жауабында айтты.

Бас прокуратураның мәліметінше, Қазақстан футбол федерациясы мен бірқатар клубта тексеріс жүргізіліп, бірнеше заңбұзушылық анықталған. Олардың қатарында келісілген матчтар мен футболшылардың букмекерлік кеңселерге бәс тіккені де бар.

«Еңбек шарттарымен тыйым салынғанына қарамастан, футболшылар мен жаттықтырушылар букмекерлік ставкаларға қатысуды жалғастырып келген. Мәселен, Ақтөбеде 9 футболшы жалпы сомасы 110 млн теңгеге бәс тіккен. Осыған байланысты 2025 жылғы 2 сәуірде Федерацияға заңбұзушылықтарды жою туралы ұсыныс енгізілді», – деді Берік Асылов.

Прокуратура тексерісінен кейін Федерация басшылығымен, басқарушы директорымен және бірнеше департамент жетекшісімен еңбек шарттары бұзылған, кейбір басшының лауазымы төмендетілген.

Қазір Федерация заңдылықты қалпына келтіру, қаржылық тәртіпті күшейту және футболды дамытудың жаңа міндеттеріне сай ұйымдық құрылымын оңтайландыру бағытында жұмыс жүргізіп жатыр.