Ақтөбе облысында бес ауылды құм басып жатыр

Ақтөбе облысының Байғанин ауданында құм көшкіні күшейіп барады. Әсіресе Баршақұм және Жарқамыс ауылдарына тікелей қауіп төніп тұр. Қазір екі елді мекен маңында құм тоқтату жұмыстары жүргізілуде, алайда егілген бұталар қурап, ұйытқыған желге тосқауыл бола алмай қалған.

Скриншот: 24.kz

Баршақұм ауылының тұрғыны Сүйіндік Жәми соңғы жылдары ауыл шетіндегі қора-қопсыларды құм басып, көміліп жатқанын айтты. Оның сөзінше, жеті-сегіз жыл бұрын тегіс жерде тұрған қоралар қазір құмның ысырылуынан жардың етегінде қалған. Жергілікті тұрғын құмның қар сияқты еріп кетпейтінін, тіпті тасталған құмды да жел қайтадан боратып әкелетінін жеткізді.

Ауылдың тағы бір тұрғыны Марғұлан Төлеп те мәселені қозғады. Оның айтуынша, мердігер компания үш жыл бойы егілген ағаштарға қарап, толық өсіп кеткенше бақылаймыз деп уәде бергенімен, соңғы бір жылдан бері ауылға келмеген. Тұрғын бөлінген қаржының да «құмға сіңіп кеткендей» болғанын айтты.

Мердігер компания өкілдері, керісінше, кінәні қаржыландырудың кешіктірілуімен түсіндірді. Өндіріс жетекшісі Арман Нұрғисаев қаңтар айынан бері жұмысшыларға жалақы төленбей отырғанын, қаражат уақытылы аударылмағандықтан көшеттер де суарылмай қалғанын мәлімдеді. Дегенмен ол күзде көшеттерді қайта егетіндерін және жүктелген міндеттен бас тартпайтындарын атап өтті.

Ал облыстық табиғи ресурстар басқармасы мердігердің міндетін сапасыз атқарғанын алға тартты. Басқарма басшысының орынбасары Бекболат Құлмағамбетов маусым айында жүргізілген тексеру кезінде егілген көшеттердің небәрі 10 пайызы ғана жерсінгенін айтты. Сол себепті ведомство қаражат төлеуден бас тартып, сотқа жүгінген.

Құм көшкінін тоқтатуға бағытталған бұл жоба үш жылға жоспарланған. Келер жылы 22 гектар жердегі жасыл белдеу жайқалып тұруы тиіс. Алайда Байғанин ауданында экологиялық қауіп төнген тағы үш ауыл бар.

Ақпарат 24.kz