АҚШ Қазақстанмен саудаға қойылған шектеуді алып тастауға дайын

АҚШ Конгресі Қазақстанға қатысты Джексон–Вэник түзетуін жою мәселесін қарастыруға дайын. Бұл жөнінде Қазақстанның Премьер-министрінің баспасөз қызметі хабарлады.

АҚШ-қа ресми сапары барысында Премьер-министрдің орынбасары – Ұлттық экономика министрі Серік Жұманғарин Конгрестегі Бюджет және салық комитетінің мүшесі, «Қазақстан–АҚШ» достық тобының теңтөрағасы Джимми Панеттамен келіссөз өткізді. Кездесуде тараптар екі ел арасындағы экономикалық ынтымақтастықты нығайту және сауда шектеулерін алып тастау мәселесін талқылады.

Серік Жұманғарин өз сөзінде Конгресте Қазақстанға қатысты Джексон–Вэник түзетуін алып тастау жөніндегі мәселенің тезірек шешілуіне үміт білдіріп, Панеттаға көрсеткен қолдауы үшін алғыс айтты.

Аталған түзету 1974 жылы АҚШ-тың сауда туралы заңына енгізілген болатын. Ол адам құқықтарын бұзады деп есептелген елдермен сауда қатынасын шектеуді көздейді.

«Қазақстан инвестиция тартуға және бизнес жүргізуге қолайлы, тұрақты әрі болжамды орта болып қала береді», – деп мәлім етті Үкіметтің баспасөз қызметі.

Бұл мәселе сондай-ақ Серік Жұманғариннің Конгрестің Бюджет және салық комитетінің тағы бір мүшесі Томас Суоззимен кездесуінде де талқыланды.

Үкімет мәліметінше, АҚШ Конгресіндегі барлық депутат аталған шектеуді жою бастамасын қолдауға дайын екендерін білдірген.