Ақорда мен Ақ үй байланысы: Трамп пен Тоқаев маңызды мәселелерді талқылады

Ақ үй басшысы Дональд Трамп Қазақстан Президенті Қасым-Жомарт Тоқаевпен телефон арқылы сөйлескенін хабарлады.

Бұл туралы АҚШ Президенті өзінің Truth Social парақшасында жазды.

Трамп телефон арқылы сөйлесу барысында тараптар жалғасып жатқан қақтығыстарда бейбітшілік орнатудың маңыздылығын, сондай-ақ елдер арасындағы сауда мен ынтымақтастықты кеңейту мәселелерін талқылағанын айтты. Ақ үй басшысы Қазақстан мен АҚШ арасындағы қарым-қатынасты «ерекше» (outstanding) деп атады.

Сонымен қатар Дональд Трамп 2026 жылы Америка Құрама Штаттары Майамиде G20 саммитін қабылдайтынын және Қазақстан Президентіне осы маңызды шараға қатысу үшін шақырту жіберілетінін мәлімдеді.
Бұған дейін Ақорда Мемлекет басшысы Қасым-Жомарт Тоқаевтың АҚШ Президенті Дональд Трамппен ұзақ уақытқа созылған телефон арқылы сөйлескенін хабарлаған болатын. Қазақстан мен АҚШ президенттері екіжақты күн тәртібі мен ағымдағы халықаралық жағдайға, соның ішінде Украина мәселесіне қатысты жан-жақты пікір алмасты.