Щучинскіде жеті адамның өмірін қиған өртке байланысты қылмыстық іс қозғалды

Ақмола облысында жеті адамның қазасына әкеп соққан өрт фактісі бойынша қылмыстық іс қозғалды. Бұл туралы өңірлік полиция департаменті хабарлады.

Тергеу Қылмыстық кодекстің 292-бабы 3-бөлігі – «Өрт қауіпсіздігі талаптарын бұзу, абайсызда екі немесе одан да көп адамның өліміне әкеп соғу» бойынша жүргізілуде. Аталған бап бойынша 10 жылға дейін бас бостандығынан айыру жазасы қарастырылған.

Төтенше жағдайлар департаментінің соңғы мәліметінше, оқиға кезінде 10 адам құтқарылған. Алғашында 26 адам зардап шекті деп хабарланған, кейін бұл көрсеткіш 28-ге дейін артты. Оның ішінде 13 адам ауруханаға жатқызылды, олар түрлі дәрежедегі күйік алған.

Ведомство мәліметінше, жанып жатқан дәмханадан екі оттегі және бес газ баллоны шығарылып, ғимарат ішінде тағы жарылыс болуының алды алынған. Қазіргі уақытта оқиғаның себептері мен мән-жайы анықталуда.

Полиция департаментінде 8 (7162) 51-42-98 нөмірі бойынша жедел желі жұмыс істеп тұр.

Еске салайық, 27 ақпанға қараған түні Щучинск қаласында бес қабатты тұрғын үйге жапсарлас орналасқан «Центр плова» дәмханасында газ жарылып, артынша өрт шыққан болатын.