Әкімшілік амнистия аясында айыппұлдар кешірілуі мүмкін

Қазақстанда әкімшілік амнистия аясында азаматтардың айыппұлдарын есептен шығару мәселесі қарастырылып жатыр. Бұл туралы Үкімет отырысында ішкі істер министрі Ержан Саденов мәлімдеді.

Министрдің айтуынша, жеке тұлғалардың төлемеген айыппұлдарын толық немесе ішінара кешіру мүмкіндігі талқыланып жатыр. Алайда нақты қандай санаттағы азаматтарға қатысты болатыны, айыппұл көлемі мен есептен шығару тәртібі заң жобасын әзірлеу барысында айқындалады.

Жалпы, әкімшілік амнистия қоғам мен мемлекет қауіпсіздігіне елеулі қауіп төндірмейтін құқық бұзушылықтар жасаған тұлғаларға қолданылмақ.

Сонымен қатар бірқатар санаттағы адамдар амнистияға ілікпейді. Олардың қатарында:

• террористік және экстремистік қылмыс жасағандар,

• сыбайлас жемқорлыққа қатысы барлар,

• кәмелетке толмағандарға қарсы қылмыс жасағандар,

• азаптау фактілері бойынша айыпталғандар,

• рецидивистер мен іздеуде жүрген тұлғалар бар.

Еске салайық, бұған дейін Президент Қасым-Жомарт Тоқаев Парламентке қосымша амнистия туралы заңды осы сессияның соңына дейін қабылдауды тапсырған болатын. Мемлекет басшысы 2025 жылы қылмыстық амнистия жүргізілгенін атап өтіп, енді қауіпсіздікке қатер төндірмейтін құқық бұзушылықтар бойынша қосымша, оның ішінде әкімшілік амнистия өткізуге мүмкіндік бар екенін айтқан.

Айта кету керек, әкімшілік амнистия Қазақстан тарихында алғаш рет жүзеге асырылмақ.