Air Astana АҚШ-қа тікелей ұшуға мүмкіндік беретін алғашқы ұшағын желтоқсанда алады

Air Astana әуе компаниясы алғашқы Boeing 787 Dreamliner ұшақтарын 2026 жылғы желтоқсанда алады. Жаңа ұшақтар Қазақстаннан Нью-Йорк пен Токиоға тікелей әуе бағытын ашуға мүмкіндік береді. Бұл туралы компанияның бас атқарушы директоры Ибрахим Жанлыел мәлімдеді, деп хабарлады Kursiv.

Оның айтуынша, Boeing 787 қазір пайдаланылып жүрген Boeing 767 ұшағына қарағанда алыс қашықтыққа ұша алады. Соның арқасында компания мұхитаралық бағыттарды іске қосуды жоспарлап отыр.

«Жаңа ұшақ әуе компаниясына қазір пайдаланылып жүрген Boeing 767-ге қарағанда алыс бағыттарға ұшуға мүмкіндік береді. Бұл мұхитаралық бағыттарды қоса алғанда, ұзақ қашықтықтағы рейстерді ашуға жол ашады. Сонымен қатар ұшақтың екі қызмет көрсету санатында да заманауи орындықтар мен Wi-Fi болады және бір рейсте 20 тоннаға дейін жүк тасымалдай алады», – деді Жанлыел.

Әуе паркі 86 ұшаққа дейін ұлғаяды

Air Astana тобы 2030 жылға қарай әуе паркін қазіргі 63 ұшақтан 86 ұшаққа дейін көбейтуді жоспарлап отыр.

Boeing 787 Dreamliner ұшақтарының келуі компанияның алыс бағыттарға ұшу мүмкіндігін кеңейтпек. Соның ішінде Қазақстан мен АҚШ арасында тікелей әуе қатынасын іске қосу көзделген.

Бұған дейін Премьер-Министр Олжас Бектенов Қазақстаннан АҚШ-қа тікелей әуе рейсін 2026 жылдың соңына дейін іске қосуды тапсырған еді.