Жылу беру жүйесіне тарифтер өсуі мүмкін – Энергетика министрі

Энергетика министрі Алмасадам Сәтқалиев жылу энергиясына тарифтерді көтеру қажеттігін мәлімдеді.

«Жылу желілеріне келетін болсақ, айтарлықтай шығындар қажет болады. Қазақстан Республикасының азаматтары үшін тарифтердің күрт өсуі болмайды, яғни айтарлықтай өсуін күтпеңіз. Өсім Экономика министрлігі белгілеген инфляция дәлізі аясында жүзеге асады, яғни қажетті деңгейге жету Үкіметтің жоспарларына сәйкес кезең-кезеңімен жүзеге асырылады», - деді Сәтқалиев Мәжіліс отырысында.

Министрге осыған дейін де коммуналдық қызмет тарифтерінің күрт көтерілгені ескертілді.

«Бұған дейінгі өсім, айтып өткенімдей, шұғыл шараларды қабылдау, оның ішінде білікті кадрларды сақтап қалу қажеттілігімен байланысты болды. Тарифтердің көтерілуі бірінші кезекте қажетті жөндеу жұмыстарын жүргізуге, қыс мезгіліне дайындыққа және жалақыны салалық орташа көрсеткішке жеткізуге бағытталған. Кейбір салаларда ғана біз өндірістік персоналдың жалақысының мұндай деңгейіне әлі жетпедік. Бұл өсім станцияның жинақталған тозуы мен техникалық жағдайына байланысты болды. Тарифке түскен ақша бірінші кезекте осы энергетикалық нысандарды қалпына келтіруге басымдық беріп, осы екі шығын бабы бойынша мақсатты түрде бөлінді», - деп түсіндірді Энергетика министрлігінің басшысы.